మూన్‌, మార్స్ పైకి బుల్లెట్ ట్రైన్‌.. స్పేస్‌లో 'సిటీ' సృష్టించ‌బోతున్న జ‌పాన్!
ఈ ప్రాజెక్ట్ 2050 నాటికి పూర్తవుతుందని పరిశోధకులు తెలిపారు. Bullet train to Mars? Such a research is indeed going on.
దిశ, వెబ్‌డెస్క్ః చంద్రుడు, అంగారక గ్రహాలపై మ‌నుషులు కాలనీలు ఏర్పాటు చేయగలరా? అనే సందేహం ఇప్ప‌టిది కాదు. అయితే, దాని కోసం ఎప్ప‌టి నుండో పరిశోధకులు, శాస్త్ర‌వేత్త‌లు, దేశాలూ పని చేస్తూనే ఉన్నాయి. ఎవ‌రు ముందు ఆ పని ప్రారంభింస్తార‌నేది చెప్ప‌డం ఇప్పుడ‌ప్పుడే సాధ్యం కాక‌పోవ‌చ్చు. అయితే, స్పేస్ రీసెర్చ్‌లో ముంద‌డుగులో ఉన్న దేశాల‌న్నీ ఇతర గ్ర‌హాల్లో మ‌నిషి జీవించ‌డానికి ఎలాంటి సౌక‌ర్యాలు ఉండాల‌నే విష‌యంలో కాన్సెప్ట్ డిజైన్‌లు సిద్ధంగా ఉంచ‌కున్నారు. కానీ, అంతరిక్షంలోకి వెళ్లడం అనేది చాలా ఖరీదైన వ్య‌వ‌హారం. ఎలోన్ మస్క్ లాంటి బిలియ‌నీర్లు అంతరిక్ష సంస్థలను స్థాపించి, ఈ దిశలోనే పనిచేస్తున్నారు. ఈ క్ర‌మంలో సాంకేతిక అభివృద్ధిలో ముందంజ‌లో ఉన్న జపనీస్ కాన్సెప్ట్ ఇప్పుడు అంత‌ర్జాతీయంగా చ‌ర్చ‌నీయాంశ‌మ‌య్యింది. ఇది గ‌నుక ఖచ్చితంగా అమలు చేస్తే, మనం బుల్లెట్ ట్రైన్‌లో ఎక్కి చంద్రుడి పైకీ, అంగారక గ్రహానికి ప్రయాణించవచ్చు! అందులోనూ, ప్రపంచానికి బుల్లెట్ రైళ్లను అందించింది కూడా జపనీస్ కావ‌డంతో ఈ ఆశ‌పై చాలా మంది ఆశాభావం వ్య‌క్తం చేస్తున్నారు కూడా!
జపాన్‌కు చెందిన క్యోటో విశ్వవిద్యాలయం, కజిమా కన్‌స్ట్రక్షన్‌ల పరిశోధకులు దీని సాధ్యాసాధ్యాల‌పై పనిచేస్తున్నారు. మూన్‌, మార్స్‌ల పైన ప్రత్యేకంగా రూపొందించిన నివాసయోగ్యమైన జోన్‌లలో భూమిపైన ఉన్న వాతావరణం లాంటి కృత్రిమ అంతరిక్ష వాతావరణాన్ని రూపొందించాలని యోచిస్తున్నారు. దీనితో పాటు అక్కడ ప్రయాణించడానికి బుల్లెట్ రైళ్లను వినియోగించాల‌ని, ఆ కాన్సెప్ట్ పైన కూడా పనిచేస్తున్నారు. దీని కోసం 'హెక్సాగాన్ స్పేస్ ట్రాక్ సిస్టమ్' పేరుతో రవాణా వ్యవస్థను సిద్ధం చేస్తున్నారు. నిజానికి, ఇతర దేశాల అంతరిక్ష అభివృద్ధి ప్లాన్‌ల‌ల్లో ఇలాంటి ప్రణాళిక లేక‌పోవ‌డం విశేషం. ఇక, "భవిష్యత్తులో మానవులు అంతరిక్షంలోకి వెళ్లేలా చేయడంలో కీలకమైన ముఖ్యమైన టెక్నాల‌జీని మా ప్లాన్‌ సూచిస్తుంది" అని క్యోటో యూనివర్సిటీకి చెందిన SIC హ్యూమన్ స్పేస్‌లజీ సెంటర్ డైరెక్టర్ యోసుకే యమషికి ఇటీవ‌ల విలేకరుల సమావేశంలో చెప్పారు. ఈ ప్రాజెక్ట్ 2050 నాటికి పూర్తవుతుందని పరిశోధకులు తెలిపారు.