టీ కాంగ్రెస్ బస్సు యాత్రకు ముహూర్తం ఫిక్స్.. పాల్గొననున్న రాహుల్ గాంధీ

దిశ, వెబ్‌డెస్క్: తెలంగాణ ఎన్నికల నేపథ్యంలో ప్రచారాన్ని ముమ్మరం చేయాలని టీ కాంగ్రెస్ నిర్ణయించింది. అందులో భాగంగా బస్సు యాత్రకు శ్రీకారం చుడుతోంది. ఈ నెల 18వ తేదీ నుంచి బస్సు యాత్ర చేపట్టాలని నిర్ణయించింది. రాష్ట్రవ్యాప్తంగా అన్ని జిల్లాల గుండా ఈ యాత్ర కొనసాగనుంది. టీపీసీసీ చీఫ్ రేవంత్ రెడ్డితో పాటు కాంగ్రెస్ ముఖ్యనేతలందరూ ఈ బస్సు యాత్రలో పాల్గొని ఎన్నికల ప్రచారం చేయనున్నారు.

ఆదివారం ఉదయం 55 మంది అభ్యర్థుల జాబితాను కాంగ్రెస్ ప్రకటించగా.. రెండు రోజుల్లో మిగతా అభ్యర్థులను కూడా ఖరారు చేయనుంది. 18వ తేదీలోపు అభ్యర్థులందరినీ ప్రటించిన తర్వాత కాంగ్రెస్ బస్సు యాత్ర యొదలుకానుంది. ఈ బస్సు యాత్రలో కాంగ్రెస్ అగ్రనేత రాహుల్ గాంధీ కూడా పాల్గొననున్నారు. మూడు రోజుల పాటు రాహుల్ బస్సు యాత్రలో పాల్గొనేలా టీ కాంగ్రెస్ కార్యాచరణ రూపొందిస్తోంది. సోనియాగాంధీ, ప్రియాంకగాంధీ కూడా పాల్గొనే అవకాశాలు కనిపిస్తున్నాయి.

ఇప్పటికే ప్రకటించిన ఆరు గ్యారెంటీలను బస్సు యాత్ర బలంగా ప్రజల్లోకి కాంగ్రెస్ తీసుకెళ్లనుంది. అలాగే గత 9 ఏళ్ల కాలంలో కేసీఆర్ ప్రభుత్వ వైఫల్యాలను ప్రజలకు తెలియచేసేలా ప్లాన్ చేస్తోన్నారు. బస్సు యాత్రలో భాగంగా పలు ప్రాంతాల్లో బహిరంగ సభలు నిర్వహించేలా రూట్‌మ్యాప్ తయారుచేస్తోన్నారు. ఇప్పటికే రూట్‌మ్యాప్ ఖరారు అవ్వగా.. త్వరలోనే అధికారికంగా ప్రకటించనున్నారు.