ఆంధ్రోడి చేతిలో TSPSC తాళాల గుత్తి: టీపీసీసీ చీఫ్ రేవంత్ రెడ్డి

దిశ, తెలంగాణ బ్యూరో: ‘‘సిట్ అంటే స్టాండ్​ మాత్రమేనని” టీపీసీసీ చీఫ్​ రేవంత్ రెడ్డి పేర్కొన్నారు. మంగళవారం సీఎల్పీ కార్యాలయంలో ఆయన మీడియాతో చిట్​చాట్​ నిర్వహించారు. సిట్ ద్వారా టీఎస్​పీఎస్సీ లీకేజ్​ పూర్తిగా బయటపడదన్నారు. గతంలో సిట్ వేసిన కేసులన్నీ ఎక్కడపోయాయని ప్రశ్నించారు. డ్రగ్స్, నయీమ్ ల్యాండ్, గోల్డ్ స్టోన్ ప్రసాద్, హౌసింగ్ బోర్డు, ఎమ్మెల్యే కొనుగోలు అంశం వంటివన్నీ పక్కదారి పట్టాయన్నారు. పైగా ఆంధ్ర వ్యక్తి చేతిలోనే సిట్​ బాధ్యతలు ఉన్నప్పుడు నిరుద్యోగులకు ఎలా మేలు జరుగుందని ప్రశ్నించారు. కేసీఆర్‌కు అనుకూలంగా నివేదికలు వచ్చే ఛాన్స్ ​ఉన్నదన్నారు.

ఇప్పటి వరకు భర్తీ చేసిన ఉద్యోగాలను డిటేల్స్ పబ్లిక్ డొమైన్‌లో పెట్టాలని హైకోర్టును కోరామన్నారు. దీంతో పాటు ఇప్పటి వరకు సిట్ ​విచారించిన విషయాలను కూడా తెలపాలని కోరినట్లు చెప్పారు. పేపర్ లీకేజ్ అంశం ప్రవీణ్, రాజశేఖర్‌లకే పరిమితం కాదని, చైర్మన్, సెక్రటరీలు, శంకర్, ​లక్ష్మీలను కూడా బాధ్యులుగా చేర్చాలన్నారు. టీఎస్​పీఎస్సీ తాళాల గుత్తి ఆంధ్రోడి చేతిలో పెట్టి తెలంగాణ ప్రజలను మోసం చేస్తున్నారన్నారు. సుమారు 30 లక్షల నిరుద్యోగులు చుక్కలు చూస్తున్నట్లు పేర్కొన్నారు.