ప్రధాని మోదీ తెలంగాణ పర్యటనలో స్వల్ప మార్పులు

దిశ, వెబ్‌డెస్క్: ప్రధాని మోదీ తెలంగాణ పర్యటనలో స్వల్ప మార్పులు చోటుచేసుకున్నాయి. అక్టోబర్ 1న తెలంగాణ పర్యటనకు మోదీ రానున్న విషయం తెలిసిందే. మహబూబ్‌నగర్‌లో పర్యటించనున్న మోదీ.. అక్కడ పలు అభివృద్ది పనులకు శంకుస్థాపన చేయనున్నారు. అనంతరం బీజేపీ నిర్వహించనున్న బహిరంగ సభలో పాల్గొని ప్రసంగించనున్నారు. ఈ సభ వేదికగా తెలంగాణ ఎన్నికలకు మోదీ శంఖారావం పూరించనున్నారు.

మోదీ బేగంపేట ఎయిర్‌పోర్ట్ నుంచి మహబూబ్‌నగర్ చేరుకుంటారని గతంలో బీజేపీ వర్గాలు వెల్లడించాయి. కానీ ఇప్పుడు మోదీ పర్యటనలో స్వల్ప మార్పులు జరిగాయి. శంషాబాద్ ఎయిర్‌పోర్ట్ నుంచి మోదీ మహబూబ్‌నగర్ చేరుకోనున్నారు. 1న మధ్యాహ్నం 1.30 గంటలకు శంషాబాద్ ఎయిర్‌పోర్ట్‌కు చేరుకుని, అక్కడ నుంచి 1.35 గంటలకు హెలికాప్టర్‌లో మహబూబ్‌నగర్ బయల్దేరతారు. 2.15 నుంచి 2. 50 వరకు పలు అభివృద్ది పనులను ప్రారంభిస్తారు. అనంతరం 3 గంటలకు బీజేపీ నిర్వహించనున్న బీజేపీ సమరభేరి సభలో పాల్గొని మాట్లాడతారు.