మెట్రోలో ప్రయాణించిన మంత్రి కేటీఆర్.. ట్రైన్‌లో నిలబడే ప్రచారం

దిశ, వెబ్‌డెస్క్: తెలంగాణ అసెంబ్లీ ఎన్నికల పోలింగ్‌కు మరో ఐదు రోజుల మాత్రమే సమయం ఉంది. ఈ నేపథ్యంలో అన్ని ప్రధాన పార్టీలు ప్రచారం హోరెత్తిస్తున్నాయి. పార్టీల అగ్ర నేతలు రంగంలోకి దిగి గెలుపే లక్ష్యంగా ప్రచారం ముమ్మరంగా చేస్తున్నారు. ప్రజలకు చేరువ అయ్యేందుకు అందివచ్చిన ప్రతి అవకాశాన్ని ఉపయోగించుకుంటూ ప్రచారం చేస్తున్నారు. ఈ క్రమంలో మంత్రి కేటీఆర్ హైదరాబాద్ మెట్రోలో ప్రయాణించి ప్రచారం నిర్వహించారు. శుక్రవారం సాధారణ ప్రయాణికుడిలా మెట్రోలో ప్రయాణం చేసిన కేటీఆర్.. ప్రయాణికులతో ముచ్చటించారు.

బీఆర్ఎస్ ప్రభుత్వం అందిస్తున్న సంక్షేమ పథకాలను ప్రయాణికులకు వివరించారు. సంక్షేమ పాలన అందిస్తోన్న బీఆర్ఎస్‌కు ఓటు వేసి మరోసారి గెలిపించాలని కేటీఆర్ ఈ సందర్భంగా ప్రయాణికులకు విజ్ఞప్తి చేశారు. ట్రైన్ ప్రయాణికులతో నిండిపోవడంతో కేటీఆర్ నిలబడే ప్రయాణికులతో ముచ్చంటించుకుంటూ తన స్టాప్‌కు చేరుకున్నారు. మంత్రి కేటీఆర్ సడెన్‌గా ట్రైన్‌లో కనిపించడంతో పలువురు ఆయనతో సెల్ఫీలు దిగారు. వరుసగా రోడ్ షోలు, సభలో పాల్గొంటున్న కేటీఆర్.. శుక్రవారం మాత్రం మెట్రోలో సాధారణ పౌరుడిలా ప్రయాణం చేసి ప్రచారం చేశారు. కేటీఆర్ మెట్రోలో ప్రయాణిం చేసిన వీడియోలు ప్రస్తుతం సోషల్ మీడియాలో వైరల్‌గా మారాయి.