Khairatabad Ganesh: నవరాత్రి ఉత్సవాలకు రండి!.. సీఎంకు ఖైరతాబాద్ ఉత్సవ కమిటీ ఆహ్వానం

దిశ, డైనమిక్ బ్యూరో: వినాయక చవితి నవరాత్రి ఉత్సవాలకు రావాలని సీఎం రేవంత్ రెడ్డికి ఖైరతాబాద్ గణేష్ ఉత్సవ కమిటీ సభ్యులు ఆహ్వానం పలికారు. హైదరాబాద్ లోని ఖైరతాబాద్ లో గణేష్ నవరాత్రి ఉత్సవాలకు ఓ ప్రత్యేకత ఉంది. ప్రతి ఏట ఇక్కడ పెద్ద విగ్రహం ఏర్పాటు చేసి వినాయక చవితి వేడుకలు ఘనంగా నిర్వహిస్తారు. ఈ ఏడాది కూడా 70 అడుగుల పెద్ద విగ్రహాని నెలకొల్పి, వేడుకలు ఘనంగా జరుపుకోవాలని ఉత్సవ కమిటీ నిర్ణయంచింది. ఈ నేపథ్యంలో ఖైరతాబాద్ లో జరిగే ఉత్సవాలకు హాజరు కావాలని సీఎం రేవంత్ రెడ్డి ఆహ్వానించారు. గురువారం జూబ్లీహిల్స్ లోని సీఎం నివాసంలో ఖైరతాబాద్ ఎమ్మెల్యే దానం నాగేందర్ సహా శ్రీ గణేష్ ఉత్సవ కమిటీ సభ్యులు ఇతర కాంగ్రెస్ నాయకులు రేవంత్ రెడ్డిని కలిశారు. ఈ సందర్భంగా.. అర్చకులు సీఎం రేవంత్ రెడ్డికి ఆశీర్వచనం అందజేశారు. అనంతరం దానం నాగేందర్ సీఎం కు శాలువ కప్పి సత్కరించారు. ఈ మేరకు గణేష్ నవరాత్రి ఉత్సవాలకు సంబంధించిన ఆహ్వాన పత్రికను రేవంత్ రెడ్డికి అందజేశారు. ఉత్సవ కమిటీ సభ్యులు సీఎంకు పుష్పగుచ్ఛం అందజేసి, ఉత్సవాలకు తప్పక హాజరు కావాలని కోరారు.