Kavitha: బతుకమ్మ ఆడే చేతులతోనే కాంగ్రెస్ కు చరమగీతం.. ఆశావర్కర్ల ఆందోళన ఘటనపై కవిత

దిశ, డైనమిక్ బ్యూరో: ఆశావర్కర్ల ఆందోళనపై (Asha workers protest) బీఆర్ఎస్ ఎమ్మెల్సీ కవిత  (MLC Kavitha) స్పందించారు. ఆశావర్కర్లపై పోలీసుల తీరు అమానుషం అని మండిపడ్డారు. ఎన్నికల సమయంలో ఇచ్చిన హామీలు అమలు చేయాలని అడిగినందుకు ఆడబిడ్డలను కాంగ్రెస్ పాలకులు ఖాకీలతో కొట్టించారని ధ్వజమెత్తారు. ఎక్స్ వేదికగా పోస్టు చేసిన కవిత.. అధికారంలోకి వచ్చి ఏడాది గడుస్తున్నా ఇచ్చిన హామీలు అమలు చేయకుండా అన్ని వర్గాలను కాంగ్రెస్ ప్రభుత్వం (Congress government) మోసం చేసిందని ఆరోపించారు. నెలకు రూ. 18 వేల ఫిక్స్డ్ వేతనం ఇవ్వాలని శాంతియుతంగా నిరసన తెలుపుతున్న ఆశావర్కర్లను దారుణంగా కొడుతూ పోలీస్ వ్యాన్ లలో ఎక్కించిన తీరు ఆనాడు తెలంగాణ ఉద్యమ సమయంలో ఉన్న నిర్భంధాలు, అణచివేతకు ఏ మాత్రం తీసిపోని విధంగా ఉన్నాయన్నారు. ఇదేనా కాంగ్రెస్ ప్రభుత్వం తెలంగాణ ఆడబిడ్డలకు సోనియా గాంధీ (Sonia Gandhi)బర్త్ డే గిఫ్ట్ అని ప్రశ్నించారు. ఇదేనా ప్రజాపాలన అంటే అని నిలదీశారు. అధికారం శాశ్వతం కాదని చాకలి ఐలమ్మ పోరాట స్పూర్తితో, బతుకమ్మ ఆడే చేతులతోనే ఆడబిడ్డలు కాంగ్రెస్ నిరంకుశ పాలనకు చరమగీతం పాడటం ఖాయం అన్నారు.