సిరిసిల్లలో సందడి చేసిన రజాకార్ మూవీ ఫేమ్

దిశ,రాజన్న సిరిసిల్ల ప్రతినిధి : సిరిసిల్లలో రజాకార్ సినిమా యూనిట్ సందడి చేశారు. రజాకార్ సినిమా విజయవంతాన్ని పురస్కరించుకుని బుధవారం జిల్లా కేంద్రంలోని విమల్ థియేటర్ లో సినిమాలో నటించిన ఇంద్రజ, రాజు అర్జున్, బలగం సహదేవ్, గిరి, సత్యనారాయణ, రమణ, శివం, డైరెక్టర్ యాట సత్యనారాయణ తో పాటు చిత్ర బృందం థియేటర్ యజమాన్యంలో ఆధ్వర్యంలో ఏర్పాటు చేసిన విజయోత్సవ వేడుకల్లో పాల్గొని సందడి చేశారు. ఈ సందర్భంగా నటి ఇంద్రజ మాట్లాడుతూ రెండున్నర ఏళ్ళు కష్టపడి సినిమా తీసి, రజాకార్లతో తెలంగాణ ప్రజలు ఎదుర్కొన్న ఇబ్బందులను డైరెక్టర్ యాట సత్యనారాయణ కళ్ళకు కట్టినట్లు చూపించారని కొనియాడారు. చరిత్ర గుర్తుచేసే ఇలాంటి సినిమాలను అభిమానులు ఆదరించి విజయవంతం చేయాలని కోరారు. రజాకార్ సినిమా మత చరిత్ర కాదని, గత చరిత్ర అని డైరెక్టర్ నారాయణరెడ్డి గుర్తు చేశారు. ఈ సినిమా మతతత్వ సినిమా కాదని, ఏ రాజకీయ పార్టీ చిత్రించిన సినిమా కాదని, ఈ చిత్రాన్ని కుటుంబ సభ్యులకు కలిసి చూసి విజయవంతం చేయాలని విజ్ఞప్తి చేశారు. అంతకుముందు చిత్ర బృందం రజాకార్లతో పోరాటం చేసిన వీరనారి చాకలి ఐలమ్మ విగ్రహానికి పూలమాల వేసి నివాళులు అర్పించారు.