బస్సు కోసం మోడల్ స్కూల్ విద్యార్థుల ధర్నా

దిశ, కథలాపూర్ : విద్యార్థుల కోసం బస్సు సౌకర్యం పునరుద్ధరించాలని కోరుతూ మోడల్ స్కూల్ విద్యార్థులు రోడ్డెక్కారు. మండలంలోని తాండ్రియాల, గంభీర్ పూర్ గ్రామాలకు చెందిన సుమారు 60 విద్యార్థులు రోడ్డుపై బైఠాయించి నిరసన వ్యక్తం చేశారు. గతంలో కోరుట్ల నుంచి నడిచే బస్సు సర్వీస్ రద్దు చేయడంతో పాఠశాల ముగిసిన తర్వాత ఇంటికి చేరుకోవడానికి రాత్రి 7 గంటలు అవుతుందని ఆవేదన వ్యక్తం చేశారు. చీకట్లో బస్సు కోసం నిరీక్షిస్తున్నామని దసరా సెలవులకు ముందు ఉన్నట్లుగానే బస్సు సర్వీసు యధావిధిగా నడపాలని విద్యార్థులు కోరారు. విషయం తెలుసుకున్న స్థానిక ఎస్ ఐ నవీన్ కుమార్ డిపో మేనేజర్ తో మాట్లాడి సమస్య పరిష్కరిస్తామని హామీ ఇవ్వడంతో నిరసన విరమించారు.