నాంపల్లి నియోజకవర్గంలో అభివృద్ధి పనులను తనిఖీ చేసిన కిషన్ రెడ్డి..

దిశ, కార్వాన్ : నాంపల్లి నియోజక వర్గంలోని పలుబస్తీల్లో కేంద్ర మంత్రి కిషన్ రెడ్డి గురువారం పర్యటించారు. మల్లేపల్లి డివిజన్లోని ప్రకాష్ నగర్, బోయిగూడ కమాన్, దగ్గర చాలా రోజులుగా నత్తనడకన పనులు సాగుతున్న, పెండింగ్ లో ఉన్న అగాపురా నాలాను తనిఖీ చేశారు. పనులు పూర్తికాకపోవడంతో అకాల వర్షాలతో నాలపొంగిపొర్లుతుండడంతో ప్రజలు తీవ్రఇబ్బందులు ఎదుర్కొంటున్నారని స్థానికులు మంత్రి దృష్టికి తేవడంతో సంబంధిత కాంట్రాక్టర్ తో మాట్లాడి వివరాలు అడిగి తెలుసుకున్నారు.

మరికొన్ని రోజుల్లో వర్షాకాలం ప్రారంభం కానున్న నేపథ్యంలో నాల పూర్తిచేయాలని అధికారులను ఆదేశించారు. అనంతరం ప్రకాష్ నగర్, హరిజన బస్తీ ధోభీ ఘాట్ కమ్యూనిటీ హాల్ ని తనిఖీ చేశారు. ఈ సందర్భంగా డీ క్లాస్ లైబ్రరీ గ్రౌండ్‌లో నూతన కమ్యూనిటీ హాల్ కు భూమి పూజ చేశారు.