గోకుల్ ప్లాట్స్ లో అగ్నిప్రమాదం

దిశ, శేరిలింగంపల్లి : షార్ట్ సర్క్యూట్ కారణంగా అపార్ట్మెంట్ లో మంటలు చెలరేగాయి. ఈ ప్రమాదంలో చిక్కుకున్న ఇద్దరు వృద్ధులను స్థానికులు రక్షించారు. ఈ ఘటనకు సంబంధించి స్థానికులు తెలిపిన వివరాల ప్రకారం.. మియాపూర్ పోలీస్ స్టేషన్ పరిధిలోని గోకుల్ ప్లాట్స్ ఎస్ అండ్ ఎస్ హోమ్స్ ప్లాట్ నెంబర్స్ 367, 368లో షాక్ సర్క్యూట్ చోటుచేసుకుంది. మొదటి అంతస్తులో ఒక్కసారిగా మంటలు చెలరేగాయి. ఈ ఘటన సమాచారం అందుకున్న ఫైర్ సిబ్బంది, స్థానికులతో కలిసి మంటలను ఆర్పివేశారు. ఇంట్లో చిక్కుకున్న వృద్ధులు మోహన్ దాస్, కృష్ణవేణిలను ఫైర్ సిబ్బంది క్షేమంగా బయటకు తీసుకువచ్చారు. ఈ భవనానికి ఫైర్ సేఫ్టీ పరికరాలు లేవని ఫైర్ సిబ్బంది గుర్తించారు. అయితే అక్కడున్న నివాసితులకు ఎలాంటి ప్రాణహాని జరగలేదని తెలిపారు.