కళాత్మక పోటీల్లో గురుకుల విద్యార్థుల హవా

దిశ, తెలంగాణ బ్యూరో: దేశవ్యాప్తంగా ముంబై కి చెందిన డ్రీం ఫ్యామిలి అనే కళారంగ సంస్థ ప్రతి ఏడాది వివిధ కళలకు సంబంధించి పోటీలను నిర్వహించి, ప్రతిభ కనబరిచిన వారికి ప్రోత్సహకరంగా పలు అవార్డులను అందిస్తోంది. ఈ పోటీల్లో ఏదులాబాద్ గురుకుల బాలుర కళాశాల విద్యార్థులు గోల్డ్ మెడల్ సాధించడం పట్ల గురుకులాల కార్యదర్శి డా. అలుగు వర్షిణి హర్షం వ్యక్తం చేసారు. గురుకుల విద్యార్థులు చదువుతో పాటు క్రీడలు , కళలు లాంటి పలు సాంస్కృతిక కార్యక్రమాల్లో మంచి ప్రతిభ కనబర్చి రాష్ట్ర స్థాయిలో పోటీ పడి అవార్డులు సాధించడం పట్ల విద్యార్థులను , కళాశాల సిబ్బందిని ఆమె అభినందించారు. డ్రీం ఫ్యామిలి సంస్థ నిర్వహించిన పోటీల్లో భాగంగా ఈ ఏడాది మార్చినెలలో ఆన్ లైన్ లో నిర్వహించిన ఈ పోటీల్లో దేశవ్యాప్తంగా మొత్తం 271 మంది విద్యార్థులు పాల్గొన్నారు.

ఇందులో 29 మంది తెలంగాణ రాష్టం నుండి ఒక్క ఏదులాబాద్ గురుకుల బాలుర జూనియర్ కాలేజ్ విద్యార్థులు విశేష ప్రతిభ కనబర్చి అవార్డులను కైవసం చేసుకున్నారు. ఈ పోటీల్లో చేతి వ్రాత , డ్రాయింగ్ , కలరింగ్ , కొలెజ్( ఛాయా చిత్రాలు ,కాగితం ముక్కలు ,ఫాబ్రిక్ లేదా ఇతర వస్తువులు వంటి వివిధ పదార్థాలను కలిపి కొత్త చిత్రాన్ని రూపొందించడం) బెస్ట్ అవుట్ ఆఫ్ వేస్ట్ ,కార్టూన్ డ్రాయింగ్ లాంటి 6 విభాగాల్లో నిర్వహించిన పోటీలో ఏదులాబాద్ గురుకుల విద్యార్థులు తమ కళా నైపుణ్యాన్ని, విశేష ప్రతిభ కనపరచడంతో ఈ అవార్డులను కైవసం చేసుకున్నారని డ్రాయింగ్ టీచర్ స్నిగ్ద తెలిపారు. ఈ పోటీలో పాల్గొన్న ఏదులాబాద్ విద్యార్థులకు ప్రశంసా పత్రాలతో పాటు గోల్డ్ మెడల్ సాధించినట్టు డ్రీం ఫ్యామిలి సంస్థ ఏదులాబాద్ కాలేజ్ ప్రిన్సిపాల్ కు ఒక లేఖ ద్వారా తెలిపారు.