మణిపూర్​ ఆపరేషన్‌లోని పోలీసులకు డీజీపీ సన్మానం..

దిశ, తెలంగాణ క్రైం బ్యూరో: మణిపూర్​లో చిక్కుకున్న తెలంగాణ విద్యార్థులను సురక్షితంగా తీసుకు రావటంలో కీలకపాత్ర వహించిన పోలీసు అధికారులను డీజీపీ అంజనీ కుమార్​మంగళవారం తన కార్యాలయంలో సన్మానించారు. ఈ సందర్భంగా ఆయన మాట్లాడుతూ అత్యవసర పరిస్థితుల్లో విద్యార్థులతోపాటు కొందరు పౌరులను ఇక్కడికి క్షేమంగా తీసుకు రావటంలో పోలీసు అధికారులు ప్రశంసనీయమైన పాత్ర వహించటం అభినందనీయం అన్నారు. పర్వత ప్రాంతమైన మణిపూర్​లో సరైన కమ్యూనికేషన్ ​వ్యవస్థ లేకున్నా అక్కడి పోలీస్, మిలటరీ అధికారులతో ఎప్పటికప్పుడు సంప్రదింపులు జరపటం, విద్యార్థులతో మాట్లాడటంతోపాటు వేర్వేరు ప్రభుత్వ విభాగాలను సమన్వయం చేసుకుని ప్రశంసనీయమని చెప్పారు. ఇలాంటి అనుభవాలు సరికొత్త పాఠాలను నేర్పిస్తాయన్నారు.

సీఐడీ అదనపు డీజీ మహేశ్​ భగవత్​ మాట్లాడుతూ.. కంట్రోల్​రూం ఏర్పాటు చేసుకుని వేర్వేరు శాఖల అధికారులతో ఎప్పటికప్పుడు సమన్వయం చేసుకుంటూ 112మందిని సురక్షితంగా రాష్ర్టానికి తీసుకు రాగలిగినట్టు తెలిపారు. కాగా, విద్యార్థులను తరలించటంలో కీలకపాత్ర వహించిన అదనపు డీజీలు మహేశ్​భగవత్, అభిలాష బిస్త్, డీఐజీ బీ.సుమతి, కంట్రోల్​రూంలో విధులు నిర్వర్తించిన జయరాం, నగేష్​బాబు, తిరుపతి, సుదర్శన్​ తదితరులను డీజీపీ అంజనీ కుమార్​సన్మానించారు. కార్యక్రమంలో అదనపు డీజీ శివధర్​రెడ్డి, ఐజీలు షానవాజ్​ఖాసీం, ఎం.రమేశ్ తదితరులు పాల్గొన్నారు.