సహకార సంఘాల అభివృద్ధికి కృషి చేయాలి

దిశ, ఆదిలాబాద్ : రైతులకు ఎంతగానో సహకారం అందించి వారి పంటల సాగుకు ఆర్థిక సహాయాన్ని చేకూర్చే జిల్లాలోని అన్ని సహకార సంఘాల అభివృద్ధికి కృషి చేయాలని జిల్లా కలెక్టర్ రాజార్షి షా అధికారులకు సూచించారు. శుక్రవారం ఆయన ఛాంబర్ లో జిల్లా సహకార అభివృద్ది కమిటీ సమావేశం నిర్వహించారు. ఈ సమావేశంలో సహకార సంస్థల అభివృద్ధి కోసం కావలసిన, తీసుకోవాల్సిన చర్యలపై పూర్తి నివేదికలు అందించాలని అన్నారు.

     ప్రస్తుతం జిల్లాలో ఉన్న ఆయా సహకార సంఘాల పరిస్థితిని గురించి అధికారులను అడిగి తెలుసుకున్నారు. సహకార సంఘాలకు రావలసిన నిధులపై అధికారులతో చర్చించారు.ఇందులో భాగంగా సహకార సంఘాల అభివద్ది పై జిల్లా కలెక్టర్ అధికారులకు పలు సూచనలు, మార్గదర్శకాలు జారీ చేశారు. ఈ సమావేశంలో అదనపు కలెక్టర్ శ్యామలాదేవి, జెడ్పీ సీఈఓ జితేందర్ రెడ్డి, డీసీఓ మోహన్, పశు సంవర్థక శాఖ ఏడీడి, మత్స్య శాఖ ఏడీ, డీసీసీబీ సీఈఓ, కార్యలయ సిబ్బంది పాల్గొన్నారు.