దాడులకు పాల్పడే వారిని కఠినంగా శిక్షించాలి..

దిశ, విశాఖపట్నం : రాష్ట్రంలో దేవాలయాలపై జరుగుతున్న వరుస దాడుల విషయంలో విశాఖ శ్రీ శారదా పీఠాధిపతి స్వరూపానందేంద్ర సరస్వతి స్వామి తీవ్రంగా స్పందించారు. ఆదివారం విజయనగరం పర్యటనలో భాగంగా విశాఖలోని శ్రీ శారదాపీఠాన్ని మంత్రి వెల్లంపల్లి సందర్శించి,స్వామీజితో చర్చించారు. ఈ సందర్భంగా స్వామిజీ మాట్లాడుతూ ఆలయాల్లో దాడులకు పాల్పడుతున్న అసాంఘిక శక్తులను నియంత్రించేందుకు దేవదాయ శాఖ కఠిన చర్యలు తీసుకోవాలని సూచించారు.

ప్రభుత్వ ప్రతిష్టతో పాటు హిందూ భక్తుల మనోభావాలను దెబ్బతీసే కుట్రను నిరోధించడం అవసరమన్నారు. దేవాలయాలపై దాడులను ప్రభుత్వం తీవ్రంగా పరిగణిస్తోందన్న సంకేతాలు భక్తులకు వెళ్లే విధంగా దాడులకు పాల్పడుతున్న వారిపై కఠిన చర్యలు తీసుకోవాలన్నారు. ఇటీవల జరిగిన దాడులపై సమగ్ర విచారణ చేపట్టి బాధ్యులపై కఠినంగా వ్యవహరించాలని మంత్రిని కోరారు.