రేపు ఐపీఎల్ షెడ్యూల్ ప్రకటన?

దిశ, స్పోర్ట్స్ : వచ్చే నెలలో ఐపీఎల్ సందడి మొదలుకానుంది. మార్చి 22 నుంచి టోర్నీ ప్రారంభమవుతుందని చైర్మన్ అరుణ్ ధుమాల్ వెల్లడించిన విషయం తెలిసిందే. తాజాగా షెడ్యూల్‌పై ఓ వార్త చక్కర్లు కొడుతుంది. గురువారం ఐపీఎల్-17వ సీజన్ షెడ్యూల్ విడుదల కానున్నట్టు తెలుస్తోంది. రేపు సాయంత్రం 5 గంటలకు స్టార్ స్పోర్ట్స్, జియో సినిమా లైవ్ షో‌లో షెడ్యూల్ రిలీజ్ అవుతుందని వార్తలు వస్తున్నాయి. దీనిపై ఐపీఎల్ నిర్వాహకులుగానీ, బీసీసీఐగానీ స్పష్టతనివ్వలేదు. అయితే, లీగ్ బ్రాడ్‌కాస్టర్ స్టార్ స్పోర్ట్స్ మాత్రం ఓపెనింగ్ మ్యాచ్‌లో చెన్నయ్‌ జట్టుతో తలపడే టీమ్ ఏదో తెలియాలంటే రేపు ఐపీఎల్ షెడ్యూల్ ప్రకటన చూడాలని ట్వీట్ చేసింది.

లోక్‌సభ ఎన్నికల నేపథ్యంలో టోర్నీ భారత్ బయట నిర్వహిస్తారన్న ప్రచారం జరిగింది. ఆ వార్తలపై ఐపీఎల్ చైర్మన్ అరుణ్ ధుమాల్ స్పందిస్తూ.. లీగ్ మొత్తం ఇండియాలోనే జరుగుతుందని స్పష్టం చేశారు. అలాగే, మొదటి 15 మ్యాచ్‌ల షెడ్యూల్‌ను రివీల్ చేస్తామని తెలిపారు. మరి, రేపు మొదటి 15 మ్యాచ్‌ల షెడ్యూల్‌ను ప్రకటిస్తారా? లేదంటే మొత్తం షెడ్యూల్‌ను రివీల్ చేస్తారో చూడాలి. చైన్నయ్‌ వేదికగా ఓపెనింగ్ మ్యాచ్ నిర్వహించనున్నట్టు తెలుస్తోంది. డిఫెండింగ్ చాంపియన్ చెన్నయ్ సూపర్ కింగ్స్, గుజరాత్ టైటాన్స్ జట్లు ఓపెనింగ్ మ్యాచ్‌లో తలపడతాయని వార్తలు వస్తున్నాయి. దీనిపై కూడా రేపు స్పష్టత రానుంది.