డబ్ల్యూటీఏ ర్యాంకింగ్స్‌లో కెరీర్ బెస్ట్ ర్యాంక్‌లు సాధించిన తెలుగమ్మాయిలు సహజ, శ్రీవల్లి

దిశ, స్పోర్ట్స్ : తెలుగమ్మాయిలు, హైదరాబాద్‌కు చెందిన యామలపల్లి సహజ, భమిడిపాటి శ్రీవల్లి రష్మిక ఉమెన్స్ టెన్నిస్ అసోసియేషన్ (డబ్ల్యూటీఏ) సింగిల్స్ ర్యాంకింగ్స్‌లో తమ స్థానాలను మెరుగుపర్చుకున్నారు. ముంబై ఓపెన్ రెండో రౌండ్‌లో వీరు ఓడిపోయినప్పటికీ.. తొలి రౌండ్‌లో తమ కంటే మెరుగైన ర్యాంకర్లను ఓడించారు. దీంతో తమ కెరీర్ బెస్ట్ ర్యాంక్‌‌లను పొందారు. టోర్నీకి ముందు 336వ ర్యాంక్‌లో ఉన్న సహజ 14 స్థానాలు ఎగబాకి 322వ ర్యాంక్‌కు చేరుకుంది. అలాగే, శ్రీవల్లి ఏకంగా 45 స్థానాలను అధిగమించి 475వ ర్యాంక్‌లో నిలిచింది. మరో భారత క్రీడాకారిణి రుతుజ 17 స్థానాలను దాటి 329వ ర్యాంక్‌కు చేరుకుంది. అంకిత రైనా 223వ ర్యాంక్‌తో భారత్ తరపున టాప్ ర్యాంక్‌లో కొనసాగుతోంది.