పోలీస్ శాఖలో కలకలంగా మారిన వీడియో.. యువతితో కానిస్టేబుల్..

దిశ, వెబ్ డెస్క్: ఓ కానిస్టేబుల్ కు సంబంధించిన వీడియో పోలీస్ శాఖలో కలకలంగా మారింది. దీంతో ఆ కానిస్టేబుల్ పై ఉన్నతాధికారులు చర్యలు తీసుకున్నారు. ఆలస్యంగా వెలుగులోకి వచ్చిన ఈ ఘటనకు సంబంధించిన వీడియో ప్రస్తుతం సోషల్ మీడియాలో వైరలవుతోంది. పోలీసులు తెలిపిన వివరాల ప్రకారం.. కర్ణాటక రాష్ట్రంలోని యలహంక ప్రాంతానికి చెందిన ఓ యువతి అర్ధరాత్రి ఇంట్లో నుంచి బయటకి వచ్చింది. వీధిలో ఉన్న కుక్కలకు ఆహారం వేసి తిరిగి ఇంట్లోకి వెళ్లబోతోంది. ఈ సమయంలో ఆ యువతికి కొద్ది దూరంలో ఉన్న ఓ వ్యక్తి అసభ్యంగా ప్రవర్తించాడు. దీంతో ఆ యువతి భయపడి గట్టిగా కేకలు వేసింది. వెంటనే ఆ వ్యక్తి ఆ యువతి వద్దకు చేరుకుని తాను కానిస్టేబుల్ ను అని చెప్పాడు. అయితే, ఇదంతా కూడా అటుగా వెళ్తున్న ఓ బాటసారి వీడియో తీశాడు. ఇది గమనించిన ఆ కానిస్టేబుల్ అతడి వద్దకు వెళ్లి ప్రాధేయపడ్డాడు. ఆ వీడియోలు డిలీట్ చేయాలని కోరాడు. ఆ వీడియోలు బయటకు వస్తే తన ఉద్యోగం పోతుందని వేడుకున్నాడు. అయితే, ఆ వీడియోలను రెండు రోజుల తర్వాత ఆ వ్యక్తి సోషల్ మీడియాలో పోస్ట్ చేశాడు. దీంతో అది వైరల్ గా మారింది. ఈ వీడియోలు పోలీస్ శాఖలో కలకలం రేపాయి. స్పందించిన ఉన్నతాధికారులు ఆ కానిస్టేబుల్ ను సస్పెండ్ చేశారు.