అభిమానులకు తారక్ విన్నపం..

రౌద్రం రుధిరం రణం.. బాహుబలి తర్వాత దర్శక ధీరుడు రాజమౌళి తెరకక్కిస్తున్న పాన్ ఇండియా చిత్రం. తారక్ కొమురం భీమ్ గా, చరణ్ అల్లూరి సీతారామరాజుగా నటిస్తున్న ఈ సినిమా రూ. 300 కోట్ల భారీ బడ్జెట్ తో తెరకెక్కుతున్న విషయం తెలిసిందే. అయితే చరణ్ పుట్టినరోజు సందర్భంగా భీమ్ ఫర్ రామరాజు పేరు తో ఫస్ట్ గ్లింప్ కానుకగా ఇచ్చిన RRR టీం.. అదే రేంజ్ లో తారక్ ఫస్ట్ లుక్ రివీల్ చేసి తనను కూడా సర్ ప్రైజ్ చేస్తుందని వెయిట్ చేస్తున్నారు ఫ్యాన్స్. కానీ.. వారి అంచనాలను తారుమారు చేస్తూ లాక్ డౌన్ కారణంగా తారక్ కు గిఫ్ట్ ఇవ్వలేక పోతున్నామని ప్రకటించింది మూవీ యూనిట్. దీనితో ఫ్యాన్స్ కోపంతో రగిలిపోతున్నారు. టీంను తిట్టిపోస్తూ ట్వీట్ల వర్షం కురిపిస్తున్నారు.

దీంతో అభిమానులు పరిస్థితిని అర్థం చేసుకోవాలని కోరారు తారక్. RRR చిత్రం నుంచి ఎలాంటి ఫస్ట్ లుక్ విడుదల కావడం లేదనే వార్త మిమ్మల్ని నిరాశకు గురిచేస్తుందని అర్థం చేసుకోగలను అన్నారు. అయితే మీ ఆనందం కోసం ఫస్ట్ లుక్ లేదా టీజర్ అందించాలని చిత్ర బృందం ఎంత కష్టపడిందనేది నాకు తెలుసన్నారు. ఒక ప్రచార చిత్రం మీ ముందు ఉండాలంటే అన్ని సాంకేతిక విభాగాలు కలిసి శ్రమించాల్సి ఉంటుందని… అయితే అధికారిక ఆంక్షల వలన అది కుదరలేదన్నారు. జక్కన్న సారధ్యంలో తెరకెక్కుతున్న RRR చిత్రం ఒక సంచలనం కలిగిస్తుంది.. మిమ్మల్ని తప్పక అలరిస్తుందన్న తారక్.. దయచేసి శాంతియుతంగా ఉండాలని కోరారు. నా విన్నపాన్ని మన్నిస్తారని ఆశిస్తున్నట్లు చెప్పాడు..