Nepal: నేపాల్‌లో హెలికాప్టర్ కూలిన ఘటనలో ఐదుగురు మృతి
నలుగురు చైనా పౌరులతో సహా ఐదుగురు మరణించినట్టు నేపాల్ పోలీసు అధికారులు ప్రకటించారు.
దిశ, నేషనల్ బ్యూరో: పొరుగున ఉన్న నేపాల్‌లో మరోసారి హెలికాప్టర్ ప్రమాదం చోటుచేసుకుంది. బుధవారం నువాకోట్‌లోని శివపురి నేషనల్ పార్క్‌లో హెలికాప్టర్ కూలిన ఘటనలో నలుగురు చైనా పౌరులతో సహా ఐదుగురు మరణించినట్టు నేపాల్ పోలీసు అధికారులు ప్రకటించారు. ఈ మేరకు నేపాల్‌కు చెందిన ఖాట్మండు పోస్ట్ కథనం పేర్కొంది. హెలికాప్టర్ ఖాట్మాండు నుంచి రాసువాకు వెళ్తున్న సమయంలో నువాకోట్ జిల్లాలోని సూర్య చౌర్ వద్ద క్రాష్ సైట్ అయినట్టు అధికారులు తెలిపారు. విమానంలో ఉన్న ఐదుగురూ మరణించారు. ప్రమాదం గురించి తెలుసుకున్న డిప్యూటి ఇన్‌స్పెక్టర్ జనరల్ ఆఫ్ పోలీస్, నేపాల్ పోలీసు అధికార ప్రతినిధి డాన్ బహదూర్ కర్కీ సంఘటనా స్థలానికి రెస్క్యూ బృందాన్ని పంపారు. త్రిభువన్ ఎయిర్‌పోర్ట్ నుంచి టెకాఫ్ అయిన మూడు నిమిషాలకే హెలికాప్టర్‌తో సంబంధాలు తెలిగిపోయినట్టు సమాచారం. కాగా, గత నెలలోనే త్రిభువన్ అంతర్జాతీయ విమానాశ్రయం(టీఐఏ) వద్ద శౌర్య ఎయిర్‌లైన్ ప్రమాదంలో 18 మంది మరణించిన సంగతి తెలిసిందే. ఇందులో పైలట్ మాత్రమే ప్రాణాలతో బయటపడ్డాడు.