Google Chrome: క్రోమ్ ఫర్ సేల్..? గూగుల్ పై అమెరికా ఒత్తిడి..!

దిశ, వెబ్‌డెస్క్: ప్రముఖ సెర్చ్ ఇంజిన్(Search Engine) దిగ్గజం గూగుల్(Google) ఏకఛత్రాధిపత్యాన్ని తగ్గించేందుకు తన క్రోమ్‌ బ్రౌజర్‌(Chrome Browser)ను అమ్మేలా అల్ఫాబెట్(Alphabet)పై ఒత్తిడి చేయాలని యూఎస్(US) డిపార్ట్‌ మెంట్ ఆఫ్‌ జస్టిస్‌(DOJ) కోరనుంది. ఈ విషయాన్ని బ్లూమ్‌బెర్గ్‌(Bloomberg) ఓ కథనంలో పేర్కొంది. సెర్చ్‌ ఇంజిన్ మార్కెట్లో గూగుల్ అక్రమంగా ఏకఛత్రాధిపత్యాన్ని ప్రదర్శిస్తున్నదని ఆగస్టులో ఓ జడ్జి రూలింగ్ కూడా ఇచ్చారు. ఇప్పుడు అదే జడ్జి వద్ద డీవోజే ఈ ప్రతిపాదనను సమర్పించాలని భావిస్తోంది. దీంతో పాటు ఆర్టిఫిషియల్ ఇంటెలిజెన్స్, గూగుల్ ఆండ్రాయిడ్‌ స్మార్ట్‌ఫోన్‌ ఆపరేటింగ్‌ సిస్టమ్‌లపై కూడా చర్యలు తీసుకోవాలని డీవోజే న్యాయమూర్తికి సూచనలు చేసినట్లు సమాచారం.

కాగా ఈ విషయంపై అధికారికంగా స్పందించడానికి డీవోజే నిరాకరించింది. మరోవైపు గూగుల్‌ రెగ్యులేటరీ అఫైర్స్ వైస్ ప్రెసిడెంట్ లీ అన్నే ముల్హోలాండ్(Lee Anne Mulholland) మాత్రం ఈ ప్రతిపాదనను తప్పుపట్టారు. ‘డీవోజే ఒక ర్యాడికల్ ఎజెండా ముందుకు తీసుకొస్తోంది. దీని వెనుక న్యాయ సమస్యలు ఉన్నాయి. ఇది వినియోగదారులకు నష్టాన్ని కలిగిస్తుందని ఆయన పేర్కొన్నారు. కాగా జడ్జి దీనిపై ఏ విధమైన తీర్పు ఇస్తారో వేచి చూడాల్సి ఉంది. సెర్చ్ ఇంజిన్ పై గూగుల్ నిజంగానే ఏకఛత్రాధిపత్యాన్ని ప్రదర్శిస్తున్నదని తీర్పు వస్తే గూగుల్ తప్పకుండా క్రోమ్(Chrome)ను వదులుకోక తప్పదని పలువురు చెబుతున్నారు.