బీజేపీ రాముడిని పూజిస్తుంది..రావణుడిలా పాలిస్తోంది: సంజయ్ రౌత్ విమర్శలు

దిశ, నేషనల్ బ్యూరో: బీజేపీ రాముడిని పూజిస్తూ.. రావణుడిలా పాలిస్తుందని శివసేన(యూబీటీ) నేత సంజయ్ రౌత్ విమర్శించారు. మహారాష్ట్ర మాజీ సీఎం ఉద్ధవ్ థాక్రేకు స్పీడ్ పోస్టులో రామమందిర ఆహ్వానం పంపడంపై ఆయన ఫైర్ అయ్యారు. సినీ తారలకూ స్వయంగా ఆహ్వానాలు పంపిన వారు రామమందిర ఉద్యమంతో సంబంధమున్న వారికి మాత్రం పోస్టులో ఇన్విటేషన్ పంపించడం సరికాదని మండిపడ్డారు. రామాలయ ఉద్యమంతో థాక్రే కుటుంబానికి సన్నిహిత సంబంధం ఉందని గుర్తు చేశారు. ‘రాముడిని పూజించండి..రావణుడిలా పాలించండి. ఏదో ఒక రోజు రాముడు మిమ్మల్ని శపిస్తారు’ అని పేర్కొన్నారు. థాక్రే ఫ్యామిలీపై వ్యవహరించిన తీరు సరిగా లేదన్నారు. అయితే స్పీడ్ పోస్టులో ఆహ్వానం పంపడంపై మహారాష్ట్ర మంత్రి స్పందించారు. ఇన్విటేషన్ వేగంగా పంపడానికి మాత్రమే దానిని ఉపయోగించామని స్పష్టం చేశారు. కాగా, ఉద్ధవ్ థాక్రే సోమవారం నుంచి రెండు రోజుల పాటు నాసిక్‌లో పర్యటించనున్నారు. అక్కడి కాలారం ఆలయంలో పూజలు చేసి గోదావరి నది ఒడ్డున మహా హారతి నిర్వహించనున్నారు.