మణిపూర్ వరదలపై హేట్ స్పీచ్.. చిక్కుల్లో తెలంగాణ ఇన్ ఫ్లూయెన్సర్

దిశ, నేషనల్ బ్యూరో: మణిపూర్ హింసపై చేసిన ప్రసంగంతో తెలంగాణకు చెందిన ఇన్ ఫ్లూయెన్సర్ మనోజ్ డేవిడ్ చిక్కుల్లో పడ్డారు. జాతిహింసకు గురైన మణిపూర్ లో ప్రకృతి వైపరీత్యాలు జరిగాలని కోరుతూ ప్రసంగం చేశారు. జులై 29, 2023లో మతబోధకుడైన మనోజ్ డేవిడ్ ఈ వీడియోని యూట్యూబ్ లో పోస్టు చేశారు. రెమాల్ తుఫాన్ వల్ల మణిపూర్ వరదలకు సంబంధించిన ఈ పాత వీడియో వైరల్ గా మారింది. మణిపూర్ లో దైవచింతన కలిగిన ప్రజలపై దాడులు జరుగుతున్నాయని మనోజ్ తన స్పీచ్ లో తెలిపారు. ఈ హింసపై దేవుడు తన ఆగ్రహాన్ని చూపించబోతున్నాడని.. ఆయన మౌనంగా లేడని అన్నారు. అమాయక ప్రజలను చంపినందుకు రెండు రూపాల్లో దేవుడు ప్రతీకారం తీర్చుకోబోతున్నారని ప్రసంగించారు. అందుకోసం తన ఇద్దరు దేవదూతలను పంపబోతున్నారని అన్నారు. ఆ ఇద్దరూ భూకంపాలు, వరదలను తెస్తున్నారని పేర్కొన్నారు. కాగా.. ఈ వీడియో వైరల్ అవ్వడంతో మణిపూర్ పోలీసులు చర్యలు తీసుకునేందుకు సిద్ధమయ్యారు. ద్వేషపూరిత ప్రసంగంపై విచారణ జరుపుతున్నామని తెలిపారు. వైరల్ అవుతున్న వీడియో వల్ల రెండు వర్గాల మధ్య శత్రుత్వం పెరుగుతుందని పేర్కొన్నారు.