Akhilesh yadav: బాబా సాహెబ్, బాబాల మధ్య పోరు.. యూపీ బైపోల్స్‌పై అఖిలేష్ యాదవ్

దిశ, నేషనల్ బ్యూరో: ఉత్తరప్రదేశ్ అసెంబ్లీ ఉప ఎన్నికలు (By polls) బాబాసాహెబ్ అంబేద్కర్‌ను నమ్మేవారికి, బాబాలను నమ్మేవారికి మధ్య జరుగుతున్న పోరు అని సమాజ్ వాదీ పార్టీ(sp) చీఫ్ అఖిలేష్ యాదవ్ (Akhilesh Yadav) అన్నారు. ఈ మేరకు సోమవారం ఆయన ఎక్స్‌లో పోస్ట్ చేశారు. ఎన్నికల్లో ఒకవైపు రాజ్యాంగాన్ని రక్షించే వారు బరిలో ఉంటే.. మరోవైపు దానిని నాశనం చేసేవారు ఉన్నారని విమర్శించారు. దేశంలో దళితులు, అల్ప సంఖ్యాక వర్గాల వారిని రాజ్యాంగమే రక్షిస్తుందన్నారు. ఈ వర్గాల ప్రజలంతా ఐక్యంగా ఉండాలని కోరారు. ఉప ఎన్నికల్లో ఎస్పీ విజయం సాధించడం ఖాయమని దీమా వ్యక్తం చేశారు. కాగా, ఉత్తరప్రదేశ్‌లోని 9 అసెంబ్లీ స్థానాలకు ఈ నెల 20న ఎన్నికలు జరగనున్నాయి. ఇండియా కూటమిలో భాగస్వామిగా ఉన్న ఎస్పీ మాత్రమే అన్ని స్థానాల్లో పోటీ చేస్తోంది. కాంగ్రెస్ ఎన్నికల బరిలోకి దిగకుండా ఎస్పీకే మద్దతిచ్చింది. దీంతో ఈ ఎన్నికల ఫలితాలపై ఉత్కంఠ నెలకొంది.