అలా రిలీజ్‌ చేయడం నాకిష్టం లేదు.. సినిమాల నుంచి తప్పుకుంటా: నాని

దిశ, సినిమా : నాని, రితూ వర్మ జంటగా రూపొందిన ‘టక్ జగదీశ్’ మూవీ ఓటీటీ రిలీజ్ విషయంలో వివాదం నెలకొన్న సంగతి తెలిసిందే. శివ నిర్వాణ డైరెక్ట్ చేసిన చిత్రాన్ని ఓటీటీ ప్లాట్‌ఫామ్‌పై విడుదల చేయడాన్ని ‘తెలంగాణ ఫిల్మ్ థియేటర్స్ అసోసియేషన్(టీఎస్‌ఎఫ్‌టీఏ)’ తప్పుబట్టింది. ఇదే సమస్యపై కొన్నిరోజుల కిందట సమావేశమైన ఫిల్మ్ ఎగ్జిబిటర్స్.. ‘టక్ జగదీశ్’ను ఓటీటీకి ఇవ్వడం పట్ల ఆగ్రహం వ్యక్తం చేస్తూ.. నాని సినిమాలను ఫ్యూచర్‌లో థియేటర్స్‌లో రిలీజ్ కాకుండా బ్యాన్ విధిస్తామని బెదిరించారు. ఈ వివాదంపై ప్రీ-లాంచ్ మీట్‌లో స్పందించిన నాని.. ‘నా రాబోయే సినిమాలను థియేటర్లలో నిషేధిస్తామని కొంతమంది చెప్పారు. వారి పరిస్థితిని అర్థం చేసుకోగలను. నిజానికి వారు అలా స్పందించడంలో తప్పు లేదు. కానీ నా రాబోయే సినిమాల్లో ఏవైనా థియేట్రికల్ రిలీజ్ కాకుంటే, నేను సినిమాలు చేయడం మానేస్తానని మాట ఇస్తు్న్నా’ అన్నారు.

వాస్తవంగా బిగ్ స్క్రీన్ ఎక్స్‌పీరియన్స్‌కే ఓటేసే నేచురల్ స్టార్.. చాలా సందర్భాల్లోనూ అదే విషయాన్ని ప్రస్తావించారు. ‘టక్ జగదీశ్’ ఓటీటీ రిలీజ్ కూడా తనకు ఇష్టం లేదు. కానీ పాండమిక్ కారణంగా చాలారోజులుగా సినిమా వాయిదాపడటంతో తప్పని పరిస్థితుల్లో మేకర్స్‌ డెసిషన్‌కు కట్టుబడాల్సి వచ్చింది. కాగా వినాయక చవితి సందర్భంగా ఈ నెల 10న అమెజాన్ ప్రైమ్‌లో రిలీజ్ కాబోతోంది.