మెగాస్టార్ చిరంజీవి నిద్ర లేవగానే సురేఖ ముఖం కాకుండా.. ఎవరి ఫొటో చూస్తాడో తెలిస్తే షాక్?

దిశ, సినిమా: మెగాస్టార్ చిరంజీవి గురించి ప్రత్యేకంగా చెప్పాల్సిన పని లేదు. ఆయన ఎలాంటి బ్యాక్‌గ్రౌండ్ లేకుండానే ఇండస్ట్రీకి హీరోగా అడుగుపెట్టి ఎంతో మంది అభిమానాన్ని సంపాదించుకున్నాడు. అయితే చిరు ఇటీవల పద్మ విభూషణ్ అవార్డు అందుకుని అదే ఫామ్‌లో దూసుకెళ్తున్నాడు. ప్రస్తుతం వరుస చిత్రాల్లో నటిస్తూ యంగ్ హీరోలకు పోటీగా నిలుస్తున్నాడు. చిరంజీవి విశ్వంభర మూవీతో ప్రేక్షకుల ముందుకు రాబోతున్నాడు. ఈ సినిమాకు సంబంధించిన షూటింగ్ శరవేగంగా జరుగుతుంది. అయితే చిరు తన డాన్స్, నటనతో ప్రేక్షకులను మెప్పించి ఇప్పటికీ ఇండస్ట్రీలో కొనసాగుతున్నాడు. ఎంతోమంది ఫ్యాన్స్ నిద్రలేవగానే ఆయన ముఖం చూస్తారు అనడంలో అతిశయోక్తి లేదు. అలాంటిది ఆయన మాత్రం నిద్ర లేవగానే తన భార్య ముఖం కాకుండా ఓ హీరోయిన్ ఫొటో చూస్తున్నారని సమాచారం.

అసలు విషయంలోకి వెళితే.. హైదరాబాద్‌లో మహానటి సావిత్రి క్లాసిక్స్ బుక్ లాంచ్ ఈవెంట్ జరిగిన సంగతి తెలిసిందే. ఇందులో ఆమె కూతురు విజయ చాముండేశ్వరి పాల్గొని చిరంజీవికి సంబంధించిన ఓ సీక్రెట్‌ను రివీల్ చేసింది. ఆయన నిద్రలేవగానే ఎవరి ఫొటో చూస్తారో చెప్పి అందరినీ ఆశ్చర్యపరిచింది. చాముండేశ్వరి మాట్లాడుతూ.. ‘‘నేను చిరును మొదటి సారి వాళ్ల ఇంటికి వెళ్లి కలిశాను. అప్పుడు ఆయన కాలికి గాయం అయినప్పటికీ.. నేను వెళ్లానని తెలుసుకుని కర్ర పట్టుకుని కిందకు వచ్చారు. నన్ను పలకరించి మర్యాదలు కూడా చేశారు. ఆ తర్వాత నేను రోజు నిద్ర లేవగానే సావిత్రమ్మ ఫొటోనే చూస్తాను. నా బెడ్ ఎదురుగా మీ అమ్మ ఫొటోనే ఉంటుందని చెప్పారు.

నేను ఆయన చెప్పింది నమ్మానో లేదో అని అనుమానం వచ్చి పైకి వెళ్లి మా అమ్మ ఫొటోను తీసుకుని వచ్చి మరీ నాకు చూపించారు. చిరంజీవి విషయంలో నాకు నచ్చింది అదే. కొందరు చెప్పేది ఒకటి చేసేది మరొకటి. కానీ చిరంజీవి ఆలోచన, మాట, ఆచరణ మూడు ఒక్కటే ఉంటాయి. అందుకే ఆయన చేతుల మీదుగానే మా అమ్మ బుక్ లాంచ్ చేయించాలని నిర్ణయించుకున్నాను. అనుకున్నట్లుగానే చిరు చేతుల మీదుగా ఈ కార్యక్రమం జరగడం చాలా సంతోషంగా ఉంది’’ అంటూ చెప్పుకొచ్చింది. ప్రస్తుతం దీనికి సంబంధించిన వీడియో నెట్టింట చక్కర్లు కొడుతుండగా.. అది చూసిన ఫ్యాన్స్ సావిత్రి అంటే చిరుకి అంత ఇష్టమా అని షాక్ అవుతున్నారు.