రెండు మతాల మధ్య చిచ్చు పెట్టిన గొర్రె.. దాన్ని బలి ఇవ్వాల్సిందే అంటున్న జనాలు (వీడియో)

దిశ, సినిమా: హీరో సుహాస్ వైవిధ్యమైన కథలు, పాత్రలు ఎంచుకుంటూ ప్రేక్షకుల్లో తనకంటూ ప్రత్యేకమైన గుర్తింపు తెచ్చుకున్నాడు. ‘కలర్ ఫొటో’ చిత్రంతో ఒక్కసారిగా మంచి క్రేజ్ తెచ్చుకున్న సుహాస్.. ‘అంబాజీపేట మ్యారేజి బ్యాండు’, ‘శ్రీరంగ నీతులు’ వంటి సినిమాలతో విమర్శకులు ప్రశంసలు అందుకున్నాడు. ఇప్పుడు మరో కొత్త కథతో ప్రేక్షకుల ముందుకు వచ్చేందుకు సిద్ధం అవుతున్నాడు.

సుహాస్ ప్రధాన పాత్రలో నటిస్తున్న తాజా సినిమా ‘గొర్రె పురాణం’. బాబీ దర్శకత్వం వహిస్తున్న ఈ మూవీ సెప్టెంబర్ 20న ప్రేక్షకుల ముందుకు వచ్చేందుకు సిద్ధంగా ఉంది. ఈ క్రమంలోనే తాజాగా ‘గొర్రె పురాణం’ నుంచి ట్రైలర్ రిలీజ్ చేశారు చిత్ర బృందం. ‘ఒకే గ్రామంలో రెండు కులాల మధ్య చిచ్చు పెట్టిన గొర్రె’ అని న్యూస్ చానెల్స్‌లో వార్తలు వస్తుండగా.. ఆ గొర్రెను బలి ఇచ్చేందుకు ఆ గ్రామ ప్రజలు చూస్తారు. అలాగే.. గొర్రెపై కేసు పెట్టడంతో అది జైల్లో ఉంటుంది. చివరకు గొర్రె బయటకు ఎలా వచ్చింది.. సుహాస్ దాన్ని ఏ విధంగా కాపాడాడు.. అసలు గొర్రె చేసిన తప్పు ఏంటి.. వంటి అనేక అంశాలపై ఆసక్తి కలిగేలా ఉన్నా ఈ ట్రైలర్ ప్రజెంట్ సోషల్ మీడియాలో ఆకట్టకుంటుంది.