బిగ్‌బాస్ హౌస్‌లో సీపీఐ నారాయణ..!? గట్టి హగ్ హాట్ టాపిక్..!(వీడియో)

దిశ, వెబ్‌డెస్క్ : బిగ్ బాస్ షోపై సీపీఐ మాజీ రాష్ట్ర కార్యదర్శి నారాయణ తరచూ ఫైర్ అవుతున్న విషయం తెలిసిందే. బిగ్ బాస్ హౌస్‌ను మళ్లీ బూతుల స్వర్గంగా చేస్తారా..? అని ప్రశ్నించిన ఆయన.. అసలు ఈ షోతో ఏం సందేశమిస్తున్నారో ప్రేక్షకులు ప్రశ్నించాలని సూచించారు. కాసులకు కక్కుర్తిపడే వారు ఉన్నంత కాలం ఇలాంటి షోలు వస్తూనే ఉంటాయని నారాయణ ఫైర్ అయ్యారు. గతంలో కూడా బిగ్ బాస్ షోపై, హోస్ట్ నాగార్జునపై ఇలాంటి తరహా వ్యాఖ్యలే చేశారు. అయితే అదే బిగ్‌బాస్ హౌస్‌లో నారాయణ పేరు స్మరించారు కింగ్ నాగార్జున.

శనివారం వచ్చిన ప్రోమోలో నారాయణను పరోక్షంగా ప్రస్తావించారు నాగార్జున. మెరీనా-రోహిత్ కపుల్స్ టాపిక్‌ను తెస్తూ.. మెరీనాను కాస్త పట్టించుకో రోహిత్ అంటూ కామెంట్ చేస్తుండగా.. ఆయనకు సిగ్గు అంటూ మెరీనా చెప్పుకొచ్చింది. దీనికి నాగార్జున బదులిస్తూ.. అందరూ ఉన్నారని సిగ్గుపడకు నీకు లైసెన్స్ ఉంది అంటూ హౌస్‌లో నవ్వులు పూయించాడు. అలాగే మా అందరి కోసం మెరీనాకు ఓ గట్టి హగ్ ఇవ్వాలని రోహిత్‌కు చెప్పడంతో ఆ కఫుల్స్ ఇద్దరు కౌగిలించుకుంటారు.

అదే సమయంలో నాగార్జున స్పందిస్తూ.. 'నారాయణ.. నారాయణ.. వాళ్లిద్దరు మ్యారీడ్' అంటూ కామెంట్ చేయడం చర్చకు దారి తీసింది. సీపీఐ నారాయణకు కౌంటర్‌గానే నాగార్జున ఆ కామెంట్స్ చేశాడని బిగ్ బాస్ అభిమానులు పేర్కొంటున్నారు. మరోవైపు స్టార్ మా ప్రోమో చూసిన ప్రేక్షకులు నారాయణకు స్ట్రాంగ్ వార్నింగ్ ఇచ్చారంటూ నాగార్జునను పొగిడేస్తున్నారు.