రేవ్ పార్టీలు, ప‌బ్‌ల‌కు వెళ్లే వ్యక్తిని కాదు.. త‌ప్పుడు వార్తలు న‌మ్మకండి.. స్టార్ హీరో షాకింగ్ కామెంట్స్
బెంగుళూరు శివారు ప్రాంతంలో నిర్వహించిన రేవ్ పార్టీతో త‌న‌కు ఎలాంటి సంబంధం లేద‌ని..
దిశ, సినిమా: బెంగుళూరు శివారు ప్రాంతంలో నిర్వహించిన రేవ్ పార్టీతో త‌న‌కు ఎలాంటి సంబంధం లేద‌ని.. అసలు నేను ఆ పార్టీకే వెళ్లలేదని తెలుగు స్టార్ హీరో శ్రీకాంత్ స్పష్టం చేశారు. అంతే కాకుండా దీని గురించి క్లారిటీ ఇస్తూ ఓ వీడియో రిలీజ్ చేశారు. అందులో శ్రీకాంత్ మాట్లాడుతూ.. ‘నేను హైద‌రాబాద్‌లోని మా ఇంట్లోనే ఉన్నాను. నేను బెంగుళూరు రేవ్ పార్టీకి వెళ్లిన‌ట్లు.. పోలీసులు అరెస్ట్ చేసిన‌ట్లు ఫోన్ కాల్స్ వ‌చ్చాయి. వీడియో క్లిప్స్ చూశాను. కొంతమంది మీడియా మిత్రులు నాకు ఫోన్ చేసి క్లారిటీ తీసుకోవ‌టంతో నాకు సంబంధించిన వార్తల‌ను వారు రాయ‌లేదు. కొన్నింటిలో నేను బెంగుళూరులోని రేవ్ పార్టీకి వెళ్లాన‌ని వార్తలు వ‌చ్చాయి. ఆ న్యూస్ చూసి నాతో స‌హా మా కుటుంబ స‌భ్యులంద‌రూ న‌వ్వుకున్నాం. మొన్నమో నా భార్యతో నాకు విడాకులు ఇప్పించేశారు. ఇప్పుడేమో రేవ్ పార్టీకెళ్లాన‌ని అన్నారు. వార్తలు రాసిన వాళ్లు తొంద‌ప‌డ‌టంలో త‌ప్పులేద‌నిపించింది.
ఎందుకంటే రేవ్ పార్టీలో దొరికిన అత‌నెవ‌రో కానీ.. కొంచెం నాలాగే ఉన్నాడు. అత‌డికి కాస్త గ‌డ్డం ఉంది. ముఖం క‌వ‌ర్ చేసుకున్నాడు. నేనే షాక‌య్యాను. ద‌య‌చేసి ఎవ‌రూ న‌మ్మొద్దు. ఎందుకంటే రేవ్ పార్టీల‌కు, ప‌బ్స్ వెళ్లే వ్యక్తిని కాను నేను. ఎప్పుడైనా బ‌ర్త్‌డే పార్టీల‌కు వెళ్లినా కొంత సేపు అక్కడ ఉండి వ‌చ్చేస్తానంతే. రేవ్ పార్టీ ఎలా ఉంటుందో కూడా నాకు తెలియ‌దు. మీడియా మిత్రులు స‌హా ఎవ‌రూ న‌మ్మొద్దు. విష‌యం తెలుసుకోకుండా.. రేవ్ పార్టీలో ప‌ట్టుబ‌డ్డ శ్రీకాంత్ అంటూ థంబ్ నెయిల్స్ పెట్టేసి రాసేస్తున్నారు. నాలాగా ఉన్నాడ‌నే మీరు పొర‌బ‌డి ఉంటార‌ని నేను అనుకుంటున్నాను. నేను ఇంట్లోనే ఉన్నాను. ద‌య‌చేసి త‌ప్పుడు క‌థ‌నాల‌ను న‌మ్మొద్దు’ అంటూ చెప్పుకొచ్చారు.