పద్మ విభూషణ్ అవార్డ్ వారిదే అంటూ చిరంజీవి ఎమోషనల్ ట్వీట్

దిశ, సినిమా: పద్మభూషణ్ అవార్డులను గురువారం రాత్రి కేంద్ర ప్రభుత్వం ప్రకటించింది. ఇందులో మెగా స్టార్ చిరంజీవి కూడా అవార్డు వచ్చింది. దీంతో ఇప్పటికే చాలా మంది చిరంజీవి సోషల్ మీడియా వేదికగా శుభాకాంక్షలు తెలుపుతున్నారు. అయితే అవార్డు రావడం పట్ల చిరు ఎమోషనల్ ట్వీట్ చేశారు. ‘‘ పద్మ విభూషన్ వచ్చిందని తెలిసిన క్షణం నాకు ఏం మాట్లాడాలో ఎలా రియాక్ట్ అవ్వాలో అర్థం కావడం లేదు. మన దేశంలో రెండవ అత్యున్నత పురస్కారం పద్మవిభూషణ్ లభించినందుకు నాకు చాలా చాలా సంతోషంగా ఉంది. ఒక తల్లి కడుపున పుట్టకపోయినా నన్ను తమ సొంత మనిషిగా భావించే కోట్లాది మంది ప్రజల ఆశీస్సులు, సినీ కుటుంబ సభ్యుల అండ దండలు నీడలా నాతో నడిచే లక్షలాది మంది అభిమానుల ప్రేమ, ఆదరణ కారణంగా నేను ఈ రోజు ఈ స్థితిలో ఉన్నా.

నాకు దక్కిన ఈ గౌరవం మీది. నాపై చూపిస్తున్న ప్రేమ ఆప్యాయతలకు నేను ఏమి ఇచ్చి రుణం తీర్చుకోగలను. నా 45 ఏళ్ల సినీ ప్రస్థానంలో వెండితెరపై వైవిధ్యమైన పాత్రల ద్వారా వినోదం పంచడానికి నా శక్తిమేరకు ప్రయత్నిస్తునే ఉన్నా. నిజ జీవితంలో కూడా నా చుట్టూ ఉన్న ఈ సమాజంలో అవసరం అయినప్పుడు నాకు చేతనైన సాయం చేస్తూనే ఉన్నా. మీరు నాపై చూపిస్తున్న కొండంత అభిమానానికి నేను ప్రతీకగా ఇస్తుంది గోరంతే.

ఈ నిజం నాకు ప్రతిక్షణం గుర్తుకొస్తూనే ఉంటుంది. నన్ను బాధ్యతగా ముందుకు నడిపిస్తూ ఉంటుంది. పద్మవిభూషణ్ అవార్డుకు ఎంపిక చేసిన భారత ప్రభుత్వానికి, ప్రధాని నరేంద్ర మోడి గారికి నా హృదయపూర్వక కృతజ్ఞతలు’’ అంటూ చెప్పుకొచ్చిన వీడియోను ట్విట్టర్ వేదికగా షేర్ చేశారు. దీంతో మెగా ఫ్యామిలీతో పాటు ఫ్యాన్స్ ఆయనకు శుభాకాంక్షలు తెలుపుతూ పోస్టులు పెడుతున్నారు.