సాయి పల్లవి-నాగచైతన్య ‘తండేల్‌’ సెట్‌లో సెలబ్రేషన్స్‌.. కారణం అదేనా?

దిశ, సినిమా: సహజమైన నటనతో అందరినీ ఫిదా చేసే హీరోయిన్ సాయి పల్లవి ఓ అరుదైన ఘనతను సొంతం చేసుకుంది. ఒకే ఏడాది రెండు ఫిల్మ్‌ ఫేర్‌ అవార్డులను సొంతం చేసుకుని అందరి దృష్టిని ఆకర్షించింది. 68 వ ఫిల్మ్‌ ఫేర్‌ అవార్డ్స్‌ సౌత్ 2023లో విరాటపర్వం, గార్గి చిత్రాల్లో తన నటనకు గానూ ఉత్తమ నటి పురస్కారం అందుకుంది. ఈ రెండు అవార్డులతో ఆమె అందుకున్న ఫిల్మ్‌ఫేర్‌ అవార్డుల సంఖ్య ఆరుకు చేరింది.

ఈ సందర్భాన్ని పురస్కరించుకుని ఆమె హీరోయిన్‌గా నటిస్తున్న 'తండేల్‌' చిత్రం సెట్స్‌లో సాయిపల్లవిని నిర్మాత అల్లు అరవింద్‌, దర్శకుడు చందూ మొండేటితో పాటు చిత్ర యూనిట్‌ ఆమెను అభినందిస్తూ కేక్‌ కట్‌ చేసి సెలబ్రేట్‌ చేశారు. ప్రజెంట్ ఈ ఫొటోలు సోషల్ మీడియాలో వైరల్ అవుతున్నాయి. కాగా తండేల్ మూవీలో నాగచైతన్య, సాయి పల్లవి జంటగా చందూ మొండేటి దర్శకత్వంలో గీతా ఆర్ట్స్‌ పతాకంపై బన్నీ వాసు ఈ చిత్రాన్ని నిర్మిస్తున్నారు.