అక్కడ కూరగాయల షాప్ ప్రారంభించిన రియల్ హీరో.. ట్వీట్ వైరల్

దిశ, సినిమా: బాలీవుడ్-టాలీవుడ్ రీల్ విలన్.. రియల్ హీరో సోనూసూద్ మంచితనం గురించి ఎంత చెప్పిన తక్కువే. కరోనా విస్తృతంగా వ్యాప్తి చెందుతున్న విపత్కర పరిస్థితుల్లో.. కష్టాల్లో ఉన్నవారికి సహాయం చేసి గొప్ప మనసు చాటుకున్నారు. వలస కార్మికులను సొంత గూటికి చేర్చడమే కాకుండా.. విద్యార్థుల సమస్యలు, కార్మికుల సమస్యలు పరిష్కరించారు. శ్వాసకోశ సమస్యలతో బాధపడుతోన్న పిల్లలకు ఈ హీరో అండగా నిలిచారు.

గుండె సంబంధిత వ్యాధితో బాధపడుతున్న 4 నెలల పసి బిడ్డ వైద్య చికిత్సకు అయ్యే ఖర్చు అంతా భరిస్తానని ట్విట్టర్ వేదికన భరోసా ఇచ్చి.. ఇచ్చిన మాట నిలబెట్టుకున్నారు. దీంతో అభిమానులు సోనూసూద్ కు ఏకంగా గుడి కూడా నిర్మించారు. అప్పటి నుంచి అభిమానులు ఏదో ఒక రూపంలో సోనూసూద్ పై అభిమానాన్ని చాటుతున్నారు. తాజాగా ఖమ్మంలో ఓ మహిళ ఈ హీరో పేరుతో కూరగాయల షాప్ ప్రారంభించింది.

ఈ షాప్ లో కూరగాయలు కొనడానికి వెళ్లిన వారు ‘సోనూసూద్ కూరగాయలు’ అని ఉన్నఫ్లెక్సీని ఫొటో తీసి సోషల్ మీడియాలో షేర్ చేశారు. ఈ ఫొటో చూసిన సోనూసూద్.. ‘ఇప్పుడు నాకు కూరగాయల షాప్ కూడా ఉంది’ అంటూ ట్విటర్ లో కామెంట్ చేశాడు. ప్రతి ఒక్కరి మనసులో మీరు జీవితాంతం నిలిచి ఉంటారు సార్ అంటూ సోషల్ మీడియాలో రియల్ హీరో సోనూసూద్ పై ఎమోషనల్ కామెంట్స్ చేస్తున్నారు.