కలెక్షన్ కింగ్: 70 ఏళ్ల స్ఫూర్తి ప్రదాత

దిశ, వెబ్‌డెస్క్: కళామతల్లి ముద్దుబిడ్డ.. క్రమశిక్షణకు కేరాఫ్ అడ్రస్.. 70 ఏళ్ల నిలువెత్తు స్ఫూర్తి ప్రదాత… కలెక్షన్ కింగ్ మోహన్‌బాబు. చేస్తేనే చెప్తాడు.. చెప్పింది ఆచరణలో పెట్టి చూపిస్తాడు మిస్టర్ పర్‌ఫెక్షనిస్ట్ మోహన్‌బాబు. 1970ల ప్రారంభంలో అసిస్టెంట్ డైరెక్టర్‌గా సినీ జీవితాన్ని మొదలుపెట్టిన ఈ భక్తవత్సలం నాయుడు… 1975లో తన గురువు దాసరి నారయణరావుగారి దర్శకత్వంలో స్వర్గం నరకం సినిమాతో వెండితెరపై మెరిశారు. అంతే అప్పటి నుంచి ఇప్పటి వరకు ఆ కళామతల్లి ఆశీస్సులతో తన సినీ ప్రయాణాన్ని కొనసాగిస్తూనే ఉన్నాడు. విలన్‌గా, క్యారెక్టర్ ఆర్టిస్ట్‌గా విమర్శకుల ప్రశంసలు అందుకున్న మోహన్ బాబు… హీరోగా బాక్సాఫీస్ రికార్డులను షేక్ చేశాడు. కలెక్షన్ కింగ్‌గా వసూళ్ల వర్షం కురిపించాడు. సీనియర్ ఎన్టీఆర్ తర్వాత అంత గొప్పగా డైలాగ్ చెప్పే సత్తా మోహన్ బాబుకే ఉందంటారు ప్రముఖులు. ఆయన డైలాగ్ డెలివరీ థియేటర్లలో విజిల్స్ వేయించగా… డైలాగ్ కింగ్‌గా జేజేలు అందుకున్నారు. పెదరాయుడుగా ప్రేక్షకుల మదిలో నిలిచిపోయిన మోహన్ బాబు… 1985లో తన కూతురు పేరిట లక్ష్మీప్రసన్న పిక్చర్స్ బ్యానర్ స్థాపించి 50కి పైగా సినిమాలను నిర్మించాడు. ఇప్పటివరకు 520కి పైగా సినిమాలు చేసిన ఆయన… కళాప్రపూర్ణగా ప్రశంసలు అందుకున్నాడు. రాజ్యసభ సభ్యుడిగా కూడా పనిచేసిన మోహన్ బాబు విద్యావేత్తగా మారి 1992లో శ్రీ విద్యానికేతన్ ఎడ్యుకేషనల్ ట్రస్ట్‌ను స్థాపించారు. శ్రీ విద్యానికేతన్ ఇంటర్నేషనల్ స్కూల్, డిగ్రీ కాలేజ్, ఇంజనీరింగ్ కాలేజ్, ఫార్మసీ, నర్సింగ్ కళాశాలలను స్థాపించి విద్యాదానం చేస్తున్నారు.

70వ పుట్టినరోజు వేడుకలను జరుపుకుంటున్న మోహన్‌బాబుకు జన్మదిన శుభాకాంక్షలు వెల్లువెత్తుతున్నాయి. ఈ సందర్భంగా హీరో మంచు మనోజ్ తన తండ్రికి బర్త్ డే విషెస్ చెప్పారు. సంవత్సరంలో ఎన్ని పండుగలున్నా ఈ రోజు కోసమే ఎదురుచూస్తానని, నాన్నగారి పుట్టినరోజే మాకు పెద్దపండుగ అని తెలిపారు. ఆ భగవంతుడు మిమ్మల్ని ఎల్లప్పుడూ చల్లగా చూడాలని మనస్ఫూర్తిగా కోరుకుంటున్నాను నాన్న.. లవ్ యు సో మచ్ అంటూ ట్వీట్ చేశారు.

మోహన్‌బాబు తనయ మంచు లక్ష్మీ తన తండ్రికి విష్ చేస్తూ ట్వీట్ చేశారు. ‘మా నాన్న పుట్టిన రోజు. ప్రతీ సంవత్సరం ఈ రోజు మాకు గొప్ప వేడుక. మీరు వన్ మేన్ ఆర్మీ నాన్నా. లవ్ యూ టు ది మూన్ అండ్ బ్యాక్’ అంటూ తండ్రి పట్ల తన ప్రేమను తెలిపారు.

కరోనా వైరస్ వ్యాప్తి చెందుతున్న క్రమంలో తన పుట్టినరోజు వేడుకలను నిలిపేస్తున్నట్లు ప్రకటించారు మోహన్ బాబు. మీరందరూ ఆరోగ్యంగా ఉండాలని అభిమానులకు సూచించిన మోహన్ బాబు… మీ ఆశీస్సులే నాకు కొండంత బలం అన్నారు. నాకు పుట్టినరోజు శుభాకాంక్షలు తెలిపేందుకు ఇంత దూరం వచ్చి అనారోగ్యం బారిన పడొద్దని సూచించారు. ప్రస్తుతం మోహన్ బాబు సూర్య హీరోగా వస్తున్న ‘ఆకాశం నీ హద్దురా’ చిత్రంలో ప్రధానపాత్రలో కనిపించనున్నారు.

Tags : Mohan Babu, CoronaVirus, BirthDay, Wishes