మానవాళికి అన్నం పెట్టె రైతులకు శుభాకాంక్షలు: ఎమ్మెల్సీ కవిత

దిశ ప్రతినిధి, నిజామాబాద్: ఎమ్మెల్సీ కల్వకుంట్ల కవిత గురువారం రైతు దినోత్సవం సందర్భంగా రైతులకు శుభాకాంక్షలు తెలియజేశారు. మానవాళికి అన్నం పెట్టేందుకు అహర్నిషలు శ్రమిస్తున్న అన్నదాతలందరికీ జాతీయ రైతు దినోత్సవ శుభాకాంక్షలు అంటూ ట్వీట్ చేశారు. రైతుబంధు, రైతుబీమా, రుణమాఫీ, కాళేశ్వరం ప్రాజెక్టు, మిషన్ కాకతీయ, 24 గంటల కరెంట్ లాంటి అనేక పథకాలను ప్రారంభించిన సీఎం కేసీఆర్ వ్యవసాయాన్ని పూర్తి లాభసాటిగా మార్చారు అని కొనియాడారు.

టీఆర్ఎస్ ప్రభుత్వం కృషితో తెలంగాణ దేశానికే అన్నపూర్ణగా మారిందని తెలిపారు. రైతులకు ఏ కష్టం వచ్చినా ముందుండి పోరాడే పార్టీ టీఆర్ఎస్ పార్టీ అని అన్నారు. వడ్లు కొనబోమంటూ రైతులకు తీరని అన్యాయం చేస్తున్న కేంద్ర ప్రభుత్వంతో ఎందాకైనా కొట్లాడేందుకు టీఆర్ఎస్ సిద్దంగా ఉంది అన్నారు. రైతు శ్రేయస్సే టీఆర్ఎస్ ప్రధాన ఎజెండా అని పేర్కొన్నారు.