బాలీవుడ్‌లో జాన్ బయోపిక్ ప్లాన్

దిశ, వెబ్‌డెస్క్: రేవతి రాయ్… పలు సామాజిక సంస్థల వ్యవస్థాపకురాలు. ఆసియాలో ఫస్ట్ ఆల్ ఉమెన్ టాక్సీ సర్వీస్ హే దీదీ, ఫస్ట్ ఆల్ ఉమెన్ లాస్ట్ డెలివరీ సర్వీస్‌ను ప్రవేశపెట్టిన ఘనత ఆమెది. ఎన్నో సామాజిక సేవాకార్యక్రమాలతో మంచి గుర్తింపు పొందిన రేవతి రాయ్ ఈ తరం మహిళామణులకు ఆదర్శం. ఆమె జీవితకథ ఆధారంగా సినిమాప్లాన్ చేశారు బాలీవుడ్ హీరో జాన్ అబ్రహం. జేఏ ఎంటర్టైన్మెంట్స్, రెడ్ ఐస్ ఫిల్మ్స్, వైకా ఎంటర్టైన్మెంట్స్ సంయుక్తంగా నిర్మిస్తున్న ఈ చిత్రాన్ని రాబ్బీ గ్రెవాల్ డైరెక్ట్ చేయనున్నారు. ప్రీ ప్రొడక్షన్ స్టేజ్‌లో ఉన్న సినిమాకు త్వరలో టైటిల్ ఖరారు చేసే అవకాశం ఉంది.

ఉత్కంఠభరితమైన మలుపులతో కూడిన రేవతిరాయ్ జీవితాన్ని తెరకెక్కించండం చాలా ఆనందంగా ఉందన్నారు జాన్ అబ్రహం. ఎన్నో అసమానతలు ఉన్నా ఉత్సాహంగా తన జీవితాన్ని లీడ్ చేస్తూనే… ఎందరో బలహీన మహిళలకు చేయూతనిస్తున్న ఆమె కథ అందరికీ ఆదర్శమన్నారు. స్వాతి లోధా రచించిన ‘హూ ఈజ్ రేవతి రాయ్’ పుస్తకం ఆధారంగా చిత్రాన్ని రూపొందిస్తున్నట్లు తెలిపారు.