ఆన్​లైన్ వ్యాపారానికి గ్లోబల్​ లింకర్​

దిశ, తెలంగాణ బ్యూరో: వేలాది మంది వ్యాపార యజమానులతో ఆన్​లైన్‌లో కనెక్ట్​ అయ్యేందుకు ఎంఎస్ఎంఈ రంగానికి అవకాశం కల్పించాలని ప్రభుత్వం గ్లోబల్​ లింకర్​, సపియో అనలైటిక్స్‌తో ఒప్పందం కుదుర్చుకుంది. ఈ మేరకు ఆ సంస్థలతో పరిశ్రమల శాఖ ప్రిన్సిపల్​ సెక్రటరీ జయేష్​ రంజన్​ సోమవారం ఒప్పందాలపై సంతకాలు చేశారు. గ్లోబల్​ లింకర్ కో ఫౌండర్, సీఈఓ సమీర్ వకిల్​, అక్లౌడ్​ టెక్నాలజీస్ సీఓఓ అమిత్ పావ్, సపియో అనలైటిక్స్ సీఈఓ అశ్విన్ శ్రీవాత్సవ, గ్లోబల్ లింకర్ అసోసియేట్​ డైరెక్టర్ మాళవిక జగ్గిలు పాల్గొన్నారు.

ఈ సందర్భంగా రాష్ట్ర వ్యాప్తంగా ఎంఎస్ఎంఈ రంగ యజమానుల కోసం రాష్ట్ర గ్లోబల్ లింకర్ (http://www.ts-msme.globallinker.com) ను ఆవిష్కరించారు. ఇందులో సాఫ్ట్‌వేర్‌ను సపియో అనలైటిక్స్ రూపొందించింది. తెలుగు, ఇంగ్లీషు, హిందీ భాషల్లోనూ చూడొచ్చు. దీని ద్వారా వ్యాపారాన్ని విస్తరించొచ్చు. అమ్మకాలు, కొనుగోళ్లు, కొత్త వస్తువుల ఉత్పత్తిని సాధించే అవకాశాలు ఉన్నట్లు చెప్పారు. ఈ సందర్భంగా జయేష్ రంజన్​ మాట్లాడుతూ.. ఇది స్థానిక ఎంఎస్ఎంఈ రంగానికి ఎంతో ఉపయోగపడుతుందన్నారు. వారి లక్ష్యాలను చేరుకునేందుకు ప్లాట్ ఫారం బాగుంటుందన్నారు.