గ్యాస్ సిలిండర్ పేలి భారీ అగ్ని ప్రమాదం..

దిశ,కుకునూరు : ప్రమాదవశాత్తు ఇంట్లో ఉన్న ఓ గ్యాస్ సిలిండర్ పేలి భారీ అగ్ని ప్రమాదం జరిగింది. ఈ ప్రమాద ఘటన పశ్చిమగోదావరి జిల్లాలోని వేలేరుపాడు మండలంలో చోటుచేసుకుంది. వివరాల ప్రకారం.. గుడ్లమడుగు గ్రామానికి చెందిన పూనెం. సింగరాజు, కట్టం.అర్జున్, కట్టం.సింగరాజు, పాయం.గంగరాజులు పనుల నిమిత్తం పొలం వద్దకు వెళ్లారు. ఇంతలో ఇంట్లో ఉన్న ఓ గ్యాస్ సిలిండర్ ఆకస్మాత్తుగా పేలింది. దీంతో అగ్నికీలలు ఎగిసిపడ్డాయి.

చూస్తుండగానే పక్కనే ఉన్న మరో మూడు ఇళ్లకు మంటలు అంటుకున్నాయి. వెంటనే అప్రమత్తమైన స్థానికులు మంటలను అదుపు చేసే ప్రయత్నం చేసినప్పటికీ నాలుగు ఇళ్ళు పూర్తిగా కాలిపోయాయి. అగ్ని ప్రమాదంలో వివిధ అవసరాల కోసం ఇళ్లల్లో దాచుకున్న సుమారు 7 లక్షల రూపాయల డబ్బులు మంటల్లో కాలిపోయాయి. ఇళ్లలో ఉన్న సామాగ్రి అగ్ని ప్రమాదంలో కాలి దగ్థమైంది. ఎంతో కష్టపడి కూడబెట్టిన డబ్బు కళ్ళ ముందే కాలిపోయిందిని బాధితులు కన్నీరుమున్నీరుగా రోదిస్తున్నారు.

కాగా ఆ గ్రామానికి రహదారి మార్గం లేకపోవడంతో ఫైర్ ఇంజిన్ ఘటన స్థలానికి చేరుకోలేకపోయింది. వేలేరుపాడు రెవెన్యూశాఖ అధికారులు ఘటన స్థలానికి వచ్చి బాధితుల వివరాలు తెలుసుకున్నారు. బాధితులను ప్రభుత్వం ఆదుకోవాలని పలువురు కోరారు.