సామ్యవాద ఆదర్శాలకు నిలువెత్తు రూపం తరిమెల నాగిరెడ్డి

భారత కమ్యూనిస్టు విప్లవకారుల నాయకుడు, పీడిత ప్రజల ప్రియతముడు, భారత ప్రజా యుద్ధ పంధా రూపొందించటంలో ప్రముఖ పాత్ర వహించిన అమరుడు తరిమెల నాగిరెడ్డి. ఈయన అనంతపురం జిల్లాలోని తరిమెల గ్రామంలో 1917 జూలై 11 తేదీన సుబ్బారెడ్డి, నాగలక్ష్మమ్మ దంపతులకు జన్మించారు. పాఠశాల రోజుల నుంచే సమాజంలోని అసమానతల ఎడల తిరుగుబాటు ఆలోచన కనబర్చారు. ప్రసిద్ధి గాంచిన రుషీవ్యాలీ విద్యాలయంలో విద్యనభ్యసించారు.1932 లో లా కోర్సు చదవడానికి బెనారస్ హిందూ విశ్వవిద్యాలయంలో చేరారు. దక్షిణ భారతదేశం నుండి మొదటి విద్యార్థి సంఘం అధ్యక్షుడిగా ఎన్నికయ్యారు. రెండవ ప్రపంచ యుద్ధం జరుగుతున్న సమయంలో యుద్ధం-ఆర్థిక ప్రభావం అన్న పుస్తకం వ్రాసి యుద్ధం గురించి అందరూ ఆలోచించేలా చేశాడు. ఈ పుస్తకం రాసినందుకు బ్రిటిష్ వలస పాలకులు జైలు శిక్ష విధించి తిరుచునాపల్లి జైలుకు తరలించారు.

తండ్రిని వ్యతిరేకించి

1941లో భారతీయ రక్షణ చట్టం కింద అరెస్టు చేశారు. అప్పటి ఢిల్లీ విశ్వవిద్యాలయం వైస్ ఛాన్సలర్ మార్చ్ గ్రోవర్ చేసిన వ్యాఖ్యలకు వ్యతిరేకంగా జరిగిన ఆందోళనకు నాయకత్వం వహించారు. నాగిరెడ్డికి వ్యతిరేంగా వైస్ చాన్సలర్ గాంధీకి ఫిర్యాదు చేయగా, చాన్సలర్‌ని క్షమాపణ కోరాలని నాగిరెడ్డికి గాంధి లేఖ రాయగా, అందుకు నాగిరెడ్డి తిరస్కరించాడు. ఆ విధంగా గాంధీ మిత వాదాన్ని, బ్రిటిష్ పాలకులకు సహకరించే విధానాలను వ్యతిరేకించాడు. బెనారస్ విద్యాలయంలోనే మార్క్సిజాన్ని, రష్యా విప్లవాన్ని, స్టాలిన్ విధానాలను అధ్యయనం చేసి మార్క్సిజం బాటలో పయనించాలని నిర్ణయం తీసుకున్నారు. 1939లో కమ్యూనిస్టు పార్టీ సభ్యులయ్యి తండ్రి అనుసరిస్తున్న ప్రజావ్యతిరేక చర్యలను వ్యతిరేకించాడు. ప్రజా పోరాటాలకు నాయకత్వం వహించారు. తెలంగాణ రైతాంగ సాయుధ పోరాటానికి అవసరమైన వాటిని సమకూర్చే బాధ్యతను తీసుకున్నారు. 1948లో పార్టీపై నిషేధం విధించినప్పుడు రహస్యానికి వెళ్లారు. ప్రజా ఉద్యమాలకు, కమ్యూనిస్టు ఉద్యమానికి కంటకంగా ఉన్న తన తండ్రిని అవసరమైతే అంతమొందించాలన్న పార్టీ నిర్ణయాన్ని ఆమోదించి వర్గ చైతన్యాన్ని ప్రదర్శించారు. తండ్రిని వ్యతిరేకించి వెయ్యి ఎకరాల కుటుంబ భూములు ప్రజలకు పంపిణీ చేశారు. తన కమ్యూనిస్టు పార్టీ కార్యాచరణతో ప్రజల హృదయాల్లో నాగిరెడ్డి స్థానం పొందారు. అధికార మార్పిడి తర్వాత కూడా రాయలసీమ, కోస్తాంధ్ర ప్రాంతాలు మద్రాస్ రాష్ట్రంలో ఉన్నాయి. 1952లో మద్రాస్ శాసనసభకు ఉమ్మడి సీపీఐ అభ్యర్ధిగా అనంతపురం జిల్లా నుంచి జైలులో నుండే బావ సంజీవరెడ్డిపై పోటీ చేసి విజయం సాధించారు. 1957లో లోక్‌సభకు ఎన్నికయ్యారు. ఇలా శాసనసభ, పార్లమెంట్ సభ్యులుగా చట్ట సభల్లో ప్రజా సమస్యలను ప్రతిభావంతంగా వివరించారు. అన్ని పార్టీల గౌరవాన్ని పొందారు. విప్లవ కార్యాచరణ కోసం 1969లో శాసనసభ సభ్యత్వానికి రాజీనామా చేశారు.

సీపీఎం ఏర్పాటులో ప్రధాన పాత్ర

1952 తర్వాత భారత కమ్యూనిస్టు ఉద్యమంలో మితవాద ధోరణి ప్రారంభమైంది. 1952 పార్టీ అమోదించిన విధానాలకు వ్యతిరేకంగా అజయ్ కుమార్ నాయకత్వాన మితవాదం ముందుకు వచ్చింది. అధికార మార్పిడి జరిగింది అన్న వాక్యం స్థానంలో దేశం స్వాతంత్య్రం పొందిందనే వాక్యాన్ని కార్యక్రమంలో ప్రవేశపెట్టారు. నెహ్రును సోషలిజం అనుకూలుడుగా పేర్కొంది. భారత బూర్జువా వర్గాన్ని జాతీయ భూర్జువా వర్గంగా పేర్కొంది. కాంగ్రెస్ లోని అభ్యుదయ వాదులతో కలసి పార్లమెంటరీ ప్రజాస్వామ్యం ద్వారా సోషలిజాన్ని సాధించవచ్చని, బూర్జువా ప్రజాతంత్ర విప్లవం అవసరం లేదని మితవాద వర్గం ముందుకు తెచ్చింది. దీన్ని కమ్యూనిస్టు పార్టీలోని ఒక భాగం వ్యతిరేకించింది. అంతరంగిక పోరాటం ద్వారా విభేదాలు పరిష్కారం కాని పరిస్థితుల్లో సీపీఐ నుంచి బయటకు వచ్చిన పార్టీ శ్రేణులు 1964లో సీపీఎంగా ఏర్పడ్డారు. సీపీఎం ఏర్పాటులో తరిమెల నాగిరెడ్డి కీలక పాత్ర పోషించారు. కార్యకర్తలు ఆశించిన విధంగా సీపీఎం కార్యక్రమాలు రూపొందించి అమలు చేయటంలో విఫలమైంది. మాటల తేడా తప్ప దాని ఆచరణ సీపీఐ విధానాలకు భిన్నంగా కన్పించకపోవడంతో కార్యకర్తల్లో అసంతృప్తి ప్రారంభమైంది. అంతరంగిక సిద్ధాంత పోరాటం దేశ వ్యాపితంగా ప్రారంభమైంది. ఆంధ్రప్రదేశ్‌లో తరిమెల నాగిరెడ్డి, డి వి, చండ్ర పూల్లారెడ్డి, కొల్లా వెంకయ్య సిపిఎం విధానాలను వ్యతిరేకిస్తూ బహిరంగ లేఖ విడుదల చేశారు. వీరి నాయకత్వంలో సీపీఐఎం లోని విప్లవ శక్తులు సంఘటిత పడి సీపీఐఎం విధానాలకు వ్యతిరేకంగా సిద్ధాంత పోరాటం తీవ్రతరం చేశారు. కలిసి పని చేయడం సాధ్యం కాని పరిస్థితుల్లో నాగిరెడ్డి నాయకత్వాన అత్యధిక పార్టీ శ్రేణులు బయటకు వచ్చి ఆంధ్రప్రదేశ్ కమ్యూనిస్టు ఉద్యమ కారుల సమన్వయ కమిటీని ఏర్పాటు చేశారు. దీనికి కన్వీనర్‌గా నాగిరెడ్డి గారిని ఎన్నుకున్నారు.

ప్రజలలో ఉన్నత స్థానం పొంది

చారుమజుందార్ అతివాద, వ్యక్తిగత హింసావాదానికి వ్యతిరేకంగా కార్యాచరణ రూపొందించేందుకు మద్రాస్‌లో సమావేశమైన సందర్భంగా నాగిరెడ్డితో పాటు రాష్ట్రనాయకత్వాన్ని అరెస్టు చేసి కుట్రకేసు బనాయించింది. కేసు విచారణ సందర్భంగా తనపై మోపబడిన నేరారోపణకు సుదీర్ఘమైన స్టేట్మెంట్ కోర్టులో జడ్జీకి వినిపించాడు. దేశ ద్రోహులం మేము కాదని, దేశాన్ని పాలిస్తున్న వాళ్లే దేశ ద్రోహులని, దేశ సంపదలను విదేశీ, స్వదేశీ పెట్టుబడిదారులకు దోచిపెడుతూ, సామ్రాజ్యవాద దేశాల వద్ద అప్పులు చేసి వారికి దేశాన్ని తాకట్టు పెట్టారని, భారతదేశం తాకట్టులో ఉందని ఉదాహరణలతో వివరించారు. ఈ స్టేట్ మెంట్ పుస్తకంగా వెలువడి దేశవ్యాప్తంగా విశ్లేషకుల మెప్పు పొందింది. తాకట్టులో భారతదేశం ఉందని నాగిరెడ్డి అన్నందుకు చాలామంది వ్యతిరేకించారు. కానీ ఇప్పుడు అందరూ దేశం తాకట్టులో ఉందని అంటున్నారు. విచారణ ముగిశాక నాగిరెడ్డి, డీవీ తదితరులకు నాలుగు సంవత్సరాల శిక్ష విధించారు.

హైకోర్టులో సవాల్ చేసి బెయిల్ వచ్చిన తర్వాత వివిధ రాష్ట్రాల్లో ఉన్న విప్లవకారులను ఐక్యం చేసే కృషి నాగిరెడ్డి గారు ప్రారంభించారు. ఆ కృషిలో భాగంగా 1975లో UCCRI (ML) (భారత కమ్యూనిస్టు విప్లవకారుల సమైక్యతా కేంద్రం మార్క్సిస్టు-లెనినిస్టు) ఏర్పాటు. ఈ కృషి సాగుతున్న క్రమంలో 1975లోనే ఇందిరాగాంధీ దేశంలో అత్యవసర పరిస్థితి ప్రకటించి యూసీసీఆర్ ఐ( ML) తో పాటు ఇతర విప్లవ సంస్థలపై నిషేధం విధించింది. నాగిరెడ్డి రహస్యంగా ఉంటూనే విప్లవ కార్యక్రమాలు కొనసాగిస్తూ, విప్లవ కారుల ఐక్యతా కృషిలో నిమగ్నమై ఉండగా అనారోగ్యం పాలై మారుపేరుతో ప్రభుత్వ ఆస్పత్రిలో చికిత్స పొందుతూ 1976 జూలై 28న హైద్రబాద్‌లో ప్రాణాలు కోల్పోయారు. మృత దేహాన్ని తరిమెలకు తీసుకుపోతుండగా వెంగళరావు ప్రభుత్వం శవాన్ని అరెస్ట్ చేయించిన వార్త ప్రజలకు తెలిసి పెద్ద ఎత్తున ప్రజలు పోలీసులను చుట్టుముట్టడంతో మృత దేహాన్ని ప్రజలకు అప్పగించారు. ఈ సంఘటన ప్రజల హృదయాల్లో ఆయన స్థానాన్ని రుజువు చేస్తున్నది.తరిమెల నాగిరెడ్డి జీవితమంతా పార్టీ, పార్టీ కార్యకర్తలతో, ప్రజలతో ముడిపడి ఉంది. కమ్యూనిస్టు ఆదర్శాలకు నిలువెత్తు రూపం కామ్రేడ్ నాగిరెడ్డి. రాజీలేని సిద్ధాంత పోరాటం, వర్గ దృక్పధం ఆయనది. ఆయన చూపిన మార్గంలో విప్లవ కారులు ఐక్యం కావాలి.

(నేడు తరిమెల నాగిరెడ్డి 47 వర్ధంతి)

బొల్లిముంత సాంబశివరావు

రైతు కూలీ సంఘం కార్యవర్గ సభ్యులు

98859 83526