నవరాత్రులలో వివాహం ఎందుకు చేసుకోకూడదు.. అసలు కారణం ఏంటో తెలుసా..

దిశ, వెబ్ డెస్క్ : హిందూ మతంలో నవరాత్రి పండుగకు ప్రత్యేక ప్రాముఖ్యత ఉంది. ఈ పండుగ దుర్గామాతకు అంకితం చేసిన రోజు. శారదీయ నవరాత్రులు అశ్వినీ మాసంలోని శుక్ల పక్షం ప్రతిపాద తేదీ నాడు ప్రారంభమవుతాయి. ఈ పండుగ 9 రోజుల పాటు జరుగుతుంది. ఈ పండుగ 9 రోజులు నవదుర్గ అని పిలిచే దుర్గా మాత తొమ్మిది విభిన్న రూపాలకు అంకితం చేశారు. ఈ తొమ్మిది రోజులలో భక్తులు ఉపవాసం ఉండి, ఆలయాలను సందర్శించి దుర్గమాతకు ప్రత్యేక పూజలు చేస్తారు.

దుర్గా అష్టమి, నవమి నాడు కన్యా పూజ నిర్వహిస్తారు. దీనితో నవరాత్రి ఉత్సవాలు ముగుస్తాయి. మరుసటి రోజు దశమి తిథి నాడు దసరా జరుపుకుంటారు. నవరాత్రులలో చేసే పనులు చాలా శుభప్రదమైనవని నమ్ముతారు. అందుకే ప్రజలు నవరాత్రులలో గృహ ప్రవేశం, కొత్త వాహనం కొనుగోలు, భూమి పూజ మొదలైన వాటిని చేయడానికి ఇష్టపడతారు. కానీ నవరాత్రులలో కొన్ని ప్రత్యేక కార్యక్రమాలు చేయకూడదు, ఈ నిషేధిత కార్యక్రమాలలో వివాహం ఒకటి.

మత విశ్వాసాల ప్రకారం నవరాత్రి రోజుల్లో దుర్గామాత భూమిపైకి వచ్చి భక్తుల కష్టాలన్నింటిని తొలగిస్తుందని నమ్ముతారు. ఈ సమయంలోనే అమ్మవారి ఆశీర్వాదాలు పొందడానికి ప్రతి ఇంటిలో అమ్మ దుర్గాదేవి విగ్రహాన్ని పెట్టుకుని నవరాత్రులలో 9 రోజులు ప్రతిరోజూ ఆమెను పూజిస్తారు. ఈ పవిత్ర రోజులలో మాత దుర్గ ప్రతి ఇంటిలో నివసిస్తుందని నమ్ముతారు. అందుకే ఈ రోజుల్లో శరీరం, మనస్సు రెండింటిలోనూ స్వచ్ఛంగా ఉండాలని గ్రంధాలలో నియమం చెప్పారు. నవరాత్రి పూజల సమయంలో బ్రహ్మచర్యాన్ని పాటించడం చాలా ముఖ్యమైనదిగా పరిగణిస్తారు. ఈ కారణంగా నవరాత్రులలో వివాహం నిషేధించారట.