ఇంగ్లాండ్ మహిళా క్రికెటర్ కేట్‌కు CSK గిఫ్ట్

దిశ, స్పోర్ట్స్ : ఇంగ్లాండ్ మహిళా క్రికెటర్ కేట్ క్రాస్‌కు ఐపీఎల్‌లో చెన్నై సూపర్ కింగ్స్ జట్టంటే చాలా అభిమానం. సీఎస్కే అంటే విపరీతమైన అభిమానం చూపిస్తూ అప్పుడప్పుడూ సోషల్ మీడియాలో పోస్టులు కూడా పెడుతుంటుంది. కాగా, ఐపీఎల్ అర్దాంతరంగా వాయిదా పడటంతో ప్రపంచ వ్యాప్తంగా క్రికెట్ అభిమానులు బాధపడుతున్నారు.

ఇలాంటి సమయంలో కేట్ క్రాస్‌కు సీఎస్కే యాజమాన్యం తమ ఎల్లో కలర్ జెర్సీని కేట్‌కు పంపించింది. దాని వెనుక కేట్ అని రాసి ఉండటమే కాకుండా ఆమె జెర్సీ నెంబర్ 16ను కూడా ముద్రించింది. ఈ గిఫ్ట్ అందుకున్న కేట్ విషయాన్ని తెలియజేస్తూ ట్విట్టర్‌లో పోస్టు పెట్టింది. ‘సీఎస్కే అభిమానానికి థాంక్యూ. మీరు పంపిన జెర్సీని ఇప్పుడే వేసుకున్నాను. నాకు 16వ నెంబర్ కేటాయించడం కూడా చాలా సంతోషంగా ఉన్నది. కానీ ఐపీఎల్ వాయిదా పడటమే బాధగా ఉన్నది. అయితే ఇలాంటి పరిస్థితుల్లో బీసీసీఐ సరైన నిర్ణయమే తీసుకున్నది. మళ్లీ లీగ్ ప్రారంభం కావాలి’ అని ట్విట్టర్‌లో సందేశాన్ని ఉంచింది.