చెరువులో పడి గుర్తు తెలియని వ్యక్తి మృతి

దిశ, శేరిలింగంపల్లి : చెరువులో పడి గుర్తు తెలియని వ్యక్తి మృతి చెందిన ఘటన చందానగర్ పోలీస్ స్టేషన్ పరిధిలో చోటుచేసుకుంది. ఈ ఘటనకు సంబంధించి ఎస్సై నాగేశ్వర్ రావు తెలిపిన వివరాల ప్రకారం.. గచ్చిబౌలి డివిజన్ పరిధిలోని గోపన్ పల్లి తండా చెరువులో మృతదేహం పడి ఉన్నట్లు సమాచారం అందుకున్న పోలీసులు ఘటనా స్థలానికి చేరుకుని స్థానికుల సహాయంతో మృతదేహాన్ని వెలికి తీశారు. మృతుడి వయస్సు సుమారు 30 నుంచి 40 సంవత్సరాల మధ్యలో ఉంటుందని, రౌండ్ నెక్ క్రీమ్ కలర్ టీ-షర్ట్, కాకి కలర్ ప్యాంట్ ధరించి ఉన్నాడని, కుడి చేతికి సిల్వర్ కలర్ కడియం, ఎడమ చేతికి రబ్బర్ బ్యాండ్ ఉన్నట్లు తెలిపారు. మృతదేహం ముఖం, మోచేతులపై చెరువులో చేపలు తిన్నట్లు కనిపిస్తోందని, అతడి ఎత్తు 5.5 అడుగులు ఉంటుందని తెలిపారు. అయితే ఈత కోసం వెళ్లి మృతి చెందాడా..? లేక ఎవరైనా హత్య చేసి చెరువులో పడేశారా..? అనే కోణంలో పోలీసులు విచారిస్తున్నారు. మృతదేహాన్ని పోస్టుమార్టం నిమిత్తం ఆస్పత్రికి తరలించారు. ఈ ఘటనపై కేసు నమోదు చేసుకుని దర్యాప్తు చేస్తున్నట్లు పోలీసులు తెలిపారు. ఎవరికైన మృతుడి ఆచూకీ తెలిస్తే చందానగర్ పోలీస్ స్టేషన్ కు సమాచారం అందించాలని కోరారు.