గుర్తు తెలియని మృతదేహం లభ్యం

దిశ, చొప్పదండి : మండలంలోని రాగంపేట కాలువలో శుక్రవారం గుర్తు తెలియని మృతదేహం లభ్యమైంది. పోలీసులు తెలిపిన వివరాల ప్రకారం కాకతీయ కాలువ రాగంపేటలో లష్కర్ గా పనిచేస్తున్న కనుకయ్య విధుల్లో భాగంగా కాలువ వెంట తిరుగుతుండగా గుర్తు తెలియని మృతదేహం కనిపించింది. దాంతో రాగంపేట గ్రామపంచాయతీ సెక్రటరీ అనిల్ కు విషయం చెప్పాడు.

     అనిల్ పోలీసులకు సమాచారం అందజేయగా చొప్పదండి ఎస్ఐ అనూష కెనాల్ వద్దకు చేరుకొని మృతదేహాన్ని బయటకు తీసి పరిశీలించారు. శవం పూర్తిగా కుళ్లిపోయి గుర్తుపట్టకుండా ఉంది. మృతుని వయసు సుమారుగా 45 నుంచి 50 సంవత్సరాల మధ్యలో ఉంటుందని, ఒంటిపై నలుపు రంగు ప్యాంటు ఉందని, మృతున్ని ఎవరైనా గుర్తిస్తే చొప్పదండి పోలీస్ స్టేషన్ కి వచ్చి పూర్తి వివరాలు తెలియజేయాలని ఎస్ఐ కోరారు.