వాకింగ్‌కు వెళ్లిన జవాన్‌.. ఏనుగు చేతిలో కనుమరుగు

దిశ, భద్రాచలం : భద్రాచలం పట్టణానికి చెందిన కొంగా సాయి చంద్ర రావు అనే జవాన్ ను ఏనుగు తొక్కి చంపింది.గత 10 సంవత్సరాలుగా ఇండియన్ ఆర్మీలో నాయిబ్ సుబేదార్ గా విధులు నిర్వహిస్తున్న చంద్ర రావు డ్యూటీ లో భాగంగా ప్రస్తుతం అస్సాం రాష్ట్రంలో పనిచేస్తున్నారు. ఆదివారం మధ్యాహ్నం నామ్ గావ్ టీ ఎస్టేట్ రెండవ ఆర్మీ కంటోన్మెంట్ నుండి ఆర్మీ సిబ్బంది ఆంరీ బారీ లో నడుస్తున్నారు.ఒక్కసారిగా వీరిపైకి అడవి ఏనుగుల సమూహం దాడికి యత్నించాయి. రంగపుర లో ఈ దాడి జరగగా వాటి నుండి తప్పించుకోవడానికి పరిగెత్తే సమయంలో సాయి చంద్ర రావు అనే జవాన్ కింద పడిపోయాడు. దీంతో ఒక ఏనుగు బలంగా కాళ్ళతో తొక్కడంతో ఆయన అక్కడికక్కడే మృతి చెందారు. ఠాకూర్ బారి, రంగపుర సమీపంలో ఏనుగు దాడి జరిగినట్లుగా తెలిసింది.సోమవారం రాత్రికి చంద్ర రావు మృతదేహన్ని ఆర్మీ అధికారులు భద్రాచలం తీసుకురానున్నారు. ఈ హఠాత్పరిణామానికి ఆయన కుటుంబంలో విషాదం అలుముకుంది.