‘సర్ ఆర్థర్ కాటన్ సంకల్పం గొప్పది’

దిశ ఏపీ బ్యూరో: ఒక వ్యక్తి తలుచుకుంటే ఎన్ని అద్భుతాలు చేయవచ్చో కాటన్ మహాశయుడు రుజువు చేశాడని టీడీపీ అధినేత చంద్రబాబునాయుడు కొనియాడారు. ధవళేశ్వరం ప్రాజెక్టు రూపకర్త సర్ ఆర్థర్ కాటన్ జయంతిని పురస్కరించుకుని ట్విట్టర్ మాధ్యమంగా చంద్రబాబు స్పందించారు. కాటన్ జయంతి సందర్భంగా ఆ నిస్వార్థ ప్రజాసేవకుని స్మృతికి నివాళి అర్పిస్తున్నానంటూ వ్యాఖ్యానించారు. సాంకేతిక పరిజ్ఞానం ఏమాత్రం లేని రోజుల్లోనే ఆయన రెండు జిల్లాల పరిధిలో ఆనకట్ట, కాలువల వ్యవస్థను కేవలం 5 సంవత్సరాల్లో పూర్తి చేశాడని, ఆయన సంకల్పం మాటలకు అందనిదని కీర్తించారు. నీటి లభ్యతతో ప్రజల తలరాతను మార్చవచ్చని నిరూపించిన కాటన్ మహానుభావుని స్ఫూర్తితోనే పోలవరం ప్రాజెక్టు పూర్తి చేసేందుకు సంకల్పించిన టీడీపీ, 70 శాతం పనులు పూర్తిచేసిందని చంద్రబాబు వెల్లడించారు. అటువంటి ప్రాజెక్టు ఇవాళ పడకేయడం బాధాకరమని ఆయన ఆవేదన వ్యక్తం చేశారు.