KTR ఇలాకాలో ఉద్రిక్తత.. TRS, BJP నేతల మధ్య ఎదురుదాడి(వీడియో)

దిశ, సిరిసిల్ల : సిరిసిల్ల జిల్లా‌ కేంద్రంలో టీఆర్‌ఎస్, బీజేపీ నేతల మధ్య ఘర్షణ చోటుచేసుకుంది. ఈ ఘర్షణ ఒకరిపై ఒకరు దాడులు చేసుకునే వరకు వెళ్లింది. వివరాల్లోకి వెళ్తే.. హుజురాబాద్ నియోజకవర్గంలో సోమవారం ముఖ్యమంత్రి కేసీఆర్ దళితబంధు కార్యక్రమం ప్రారంభిస్తున్న సంగతి తెలిసిందే. ఈ నేపథ్యంలోనే టీఆర్‌ఎస్ నేతలు సిరిసిల్లలోని అంబేడ్కర్ చౌరస్తాలో సంబురాలు జరిపేందుకు వచ్చారు.

అదే సమయంలో బీజేపీ రాష్ట్ర అధ్యక్షుడు బండి సంజయ్‌పై మల్కాజ్‌గిరి టీఆర్‌ఎస్ ఎమ్మెల్యే మైనంపల్లి హన్మంతరావు చేసిన వ్యాఖ్యలకు నిరసనగా బీజేపీ నేతలు అక్కడికి చేరుకున్నారు. మైనంపల్లి హన్మంతరావు దిష్టిబొమ్మను దహనం చేసే ప్రయత్నం చేశారు. ఈ క్రమంలోనే టీఆర్‌ఎస్, బీజేపీ శ్రేణుల మధ్య మాటామాటా పెరిగింది.

దీంతో టీఆర్‌ఎస్, బీజేపీ నేతలు ఒకరిపై ఒకరు దాడులు చేసుకున్నారు. సమాచారం అందుకున్న పోలీసులు వెంటనే అక్కడికి చేరుకుని ఇరు పార్టీల నేతలకు సర్దిచెప్పారు. అనంతరం ఇరు పార్టీల నేతలను అక్కడి నుంచి పంపించారు. ఈ ఘటనతో సిరిసిల్ల పట్టణంలో ఒక్కసారిగా ఉద్రిక్త వాతావరణం చోటుచేసుకుంది.