విశాఖ ఉత్తర నియోజకవర్గం నాదే.. జగన్ పోటీ చేసినా నేనే గెలుస్తా

దిశ, డైనమిక్ బ్యూరో : ఏపీలో మరికొన్ని నెలల్లోనే ఎన్నికలు జరగనున్నాయి. ఇప్పటికే తెలంగాణలో ఎన్నికల నగరా మోగడంతో ఏపీ రాజకీయం సైతం ఒక్కసారిగా హీటెక్కింది. ఈ నేపథ్యంలో ఆశావాహులు టికెట్లపై పోటీ పడుతున్నారు. ఏ నియోజకవర్గం నుంచి గెలుపొందుతారో అనేదానిపై కూడా ఆశావాహులు లెక్కలు వేసుకుంటున్నారు. గెలుపుపై సర్వేలను సైతం చేయించుకుంటున్నారు. ఇలాంటి వారి జాబితాలో బీజేపీ రాష్ట్ర ఉపాధ్యక్షుడు విష్ణుకుమార్ రాజు చేరారు. విశాఖ ఉత్తర నియోజకవర్గం నాదే. కాబోయే ఎమ్మెల్యే నేనే అంటూ కీలక వ్యాఖ్యలు చేశారు. విశాఖలో బుధవారం విష్ణుకుమార్ రాజు మీడియాతో మాట్లాడారు. 2024 ఎన్నికల్లో విశాఖ ఉత్తర నియోజకవర్గం నుంచి పోటీ చేసి గెలుపొందుతానని ధీమా వ్యక్తం చేశారు. డబ్బులు, మద్యం పంపిణీ చేయకుండా ఎవరు పోటీ చేసినా తనదే గెలుపు అని చెప్పుకొచ్చారు. ముఖ్యమంత్రి వైఎస్ జగన్ పులివెందుల నుండి విశాఖ ఉత్తర నియోజకవర్గానికి వచ్చి పోటీ చేయమని సవాల్ విసిరారు. పొత్తు ఉన్నా, లేకున్నా , జగన్ మోహన్ రెడ్డి పోటీ చేసినా విశాఖపట్నం ఉత్తర అసెంబ్లీ నియోజకవర్గంలో తన గెలుపును ఎవరూ అడ్డుకోలేరని బీజేపీ రాష్ట్ర ఉపాధ్యక్షుడు విష్ణుకుమార్ రాజు ధీమా వ్యక్తం చేశారు.