కొడాలి నానిది రౌడీ గెటప్.. పేర్ని నాని ఆసక్తికర వ్యాఖ్యలు

దిశ, డైనమిక్ బ్యూరో : మాజీ మంత్రి కొడాలి నానిపై మచిలీపట్నం ఎమ్మెల్యే పేర్ని నాని ఆసక్తికర వ్యాఖ్యలు చేశారు. కొడాలి నాని పైకి కనిపించడం అమాయకుడు కాదని చెప్పుకొచ్చారు. గుడివాడ ఆర్టీసీ బస్ డిపో ప్రారంభోత్సవంలో పాల్గొన్న ఆయన తన మిత్రుడు అయిన కొడాలి నాని పై కీలక వ్యాఖ్యలు చేశారు. గెడ్డం, మెడలో రుద్రాక్షలతో కొడాలి నాని గెటప్ రౌడీల ఉంటుంది కానీ ఆయన బుర్ర మాత్రం పాదరసం కంటే అత్యంత వేగంగా పనిచేస్తుందని స్పష్టం చేశారు. అంతేకాదు రాజకీయాల్లో కొడాలి నాని అంత గొప్ప నాయకుడు..తెలివైన వాడు మరొకరు ఉండరని చెప్పుకొచ్చారు.

వైసీపీలో ఉన్న 151 మంది ఎమ్మెల్యేలలో తాను పెద్దగా చదువుకోలేదని.. ఏడో తరగతి వరకు చదివానని చెప్పుకుంటాడని కానీ వారందరికంటే తెలివైన వాడు కొడాలి నాని అని చెప్పుకొచ్చారు. కొడాలి నాని పై పోటీ చేసేందుకు ఇద్దరు పోటీ పడుతున్నారని ఆయనను ఓడించడం వాళ్ల తరం కాదన్నారు. నోట్లో కిల్లీ వేస్తాడు.. ఏదో అలా ఉంటాడు అనుకుంటున్నారేమోనని కానీ ఐదోసారి గెలవడానికి ఇప్పటికే స్కెచ్ వేసేశాడని ఎవరిని ఎక్కడికి ఎలా పంపాలో సిద్ధంగా ఉన్నాడని అన్నారు. మళ్లీ కొడాలి నాని గెలుపొందడం ఖాయమన్నారు. ఒక డైనమిక్ లీడర్ అయిన కొడాలి నాని తనకు మిత్రుడు గా ఉండటం ఎంతో అదృష్టమని మాజీ మంత్రి పేర్ని నాని వెల్లడించారు.