AP Deputy CM:‘మహా’ ఎన్నికల ఫలితాల పై పవన్ కళ్యాణ్ రియాక్షన్.. అదే గెలిపించిందంటూ వ్యాఖ్య

దిశ,వెబ్‌డెస్క్: మహారాష్ట్ర అసెంబ్లీ ఎన్నికల ఫలితాల్లో ‘మహాయుతి’ కూటమి విజయం సాధించింది. ఈ క్రమంలో మహాయుతి కూటమి నేతలపై అభినందనల వర్షం కురుస్తోంది. బీజేపీ నేతృత్వంలోని మహాయుతి కూటమి మరోసారి అధికారాన్ని చేపట్టనుంది. ఎన్నికల సందర్భంగా పవన్ కళ్యాణ్ మహారాష్ట్రలో ఈనెల 16, 17వ తేదీల్లో ప్రచారం నిర్వహించిన సంగతి తెలిసిందే. మహారాష్ట్రలో పవన్ కళ్యాణ్ ప్రచారం చేసిన మెజారిటీ స్థానాల్లో మహాయుతి కూటమి అభ్యర్థులు విజయం సాధించారు. ఈ నేపథ్యంలో మహారాష్ట్ర ఎన్నికల ఫలితాలపై తాజాగా ఏపీ డిప్యూటీ సీఎం పవన్ కల్యాణ్(AP Deputy CM Pawan Kalyan) ట్విట్టర్ వేదికగా స్పందించారు. మహారాష్ట్రలో మహాయుతి మెజార్టీ స్థానాల్లో గెలవడం పట్ల ఏపీ డిప్యూటీ సీఎం పవన్ కళ్యాణ్ శుభాకాంక్షలు తెలిపారు. విజనరీ ప్రధాని మోడీ నాయకత్వం పై రాష్ట్ర ప్రజలు నమ్మకం ఉంచారని.. నిజాయితీ, అభివృద్ధికి ఓటేశారని పేర్కొన్నారు. ఫడణవీస్, ఏక్‌నాథ్ శిండే, అజిత్ పవార్ సమిష్టిగా పోరాడారని పవన్ కళ్యాణ్ కొనియాడారు. ఎన్డీయే అభ్యర్థుల తరఫున మహారాష్ట్రలో తాను ప్రచారం చేయడం గౌరవంగా భావిస్తున్నట్లు పేర్కొన్నారు.