‘చంద్రబాబు చస్తాడు’ అన్న వ్యాఖ్యలపై ఎంపీ గోరంట్ల మాధవ్ వివరణ

దిశ, డైనమిక్ బ్యూరో : వంద గొడ్లను తిన్న రాబంధు చిన్న గాలి వాన వస్తే రాజమండ్రి సెంట్రల్ జైలుపడింది. 2024లు ఎన్నికల్లో వైసీపీ తుఫాను వస్తుంది. ఆ తుఫానులో టీడీపీ, టీడీపీ అధినేత కొట్టుకుపోతారంటూ హిందూపురం ఎంపీ గోరంట్ల మాధవ్ వ్యాఖ్యానించారు. ఉమ్మడి అనంతపురం జిల్లాలో ఆదివారం గోరంట్ల మాధవ్ మీడియాతో మాట్లాడారు. మరోవైపు 2024 ఎన్నికల అనంతరం చంద్రబాబు చస్తాడు అంటూ సామాజిక సాధికార యాత్రలో చేసిన వ్యాఖ్యలపై హిందూపురం ఎంపీ గోరంట్ల మాధవ్ వివరణ ఇచ్చారు. వచ్చే ఎన్నికల అనంతరం చంద్రబాబు రాజకీయంగా చస్తారు అన్నదే తన ఉద్దేశం అని వివరణ ఇచ్చారు. టీడీపీ అధినేత చంద్రబాబు నాయుడు రాజకీయంగా సమాధి అవుతారనే ఉద్దేశంతోనే వ్యాఖ్యలు చేసినట్లు తెలిపారు. వ్యాఖ్య నిర్మాణంలో తప్పులు దొర్లాయని..శబ్ధంలో ఉచ్చరణ దోషంతో తాను చేసిన వ్యాఖ్యలు టీడీపీకి తప్పుగా కనిపిస్తోందని అన్నారు. తన వ్యాఖ్యలపట్ల టీడీపీ దుష్ప్రచారం చేస్తోందని ఎంపీ గోరంట్ల మాధవ్ సంచలన ఆరోపణలు చేశారు. వచ్చే ఎన్నికల్లో రాజకీయంగా టీడీపీకి పుట్టగతులు ఉండవని అన్నారు. తన ఉద్దేశాన్ని టీడీపీ వక్రీకరించింది అని ఎంపీ గోరంట్ల మాధవ్ తెలిపారు. ఖచ్చితంగా వచ్చే ఎన్నికల్లో టీడీపీ కనుమరుగు అయిపోవడం ఖాయం అని చెప్పుకొచ్చారు. వైఎస్ఆర్ కాంగ్రెస్ పార్టీ 175 నియోజకవర్గాల్లో గెలుపొందడం ఖాయమని ఎంపీ గోరంట్ల మాధవ్ ధీమా వ్యక్తం చేశారు.