పవన్ కళ్యాణ్ గెలుపు పై మెగాస్టార్ చిరంజీవి ఆసక్తికర వ్యాఖ్యలు!

దిశ, డైనమిక్ బ్యూరో: డియర్ కళ్యాణ్ బాబు.. నువ్వు గేమ్ చేంజర్ వి మాత్రమే కాదు, మ్యాన్ ఆఫ్ ది మ్యాచ్ వి కూడా అని సినీ నటుడు, మెగాస్టార్ చిరంజీవి అన్నారు. జనసేన అధినేత పవన్ కళ్యాణ్ గెలుపు పై ట్విట్టర్ వేదికగా స్పందించిన ఆయన ఆసక్తికర వ్యాఖ్యలు చేశారు. కళ్యాణ్ బాబు.. ఎక్కడ నెగ్గాలో, ఎక్కడ తగ్గాలో తెలిసిన నిన్ను, తగ్గావని ఎవరు అనుకున్నా అది ప్రజలని నెగ్గించటానికే అని నిరూపించిన నిన్ను చూస్తుంటే ఒక అన్నగా గర్వంగా వుందని అన్నారు. నువ్వు గేమ్ చేంజర్ వి మాత్రమే కాదు, మ్యాన్ ఆఫ్ ది మ్యాచ్ వి కూడా అని అందరూ నిన్ను కొనియాడుతుంటే నా హృదయం ఉప్పొంగుతోందని తెలిపారు.
నీ కృషి, నీ త్యాగం, నీ ధ్యేయం, నీ సత్యం జనం కోసమే! ఈ అద్భుతమైన ప్రజా తీర్పు, రాష్ట్ర భవిష్యత్తు కోసం, ప్రజల సంక్షేమం కోసమని సూచించారు. అలాగే నీ కలల్ని, నువ్వేర్పరుచుకున్న లక్ష్యాల్ని నిజం చేసే దిశలో నిన్ను నడిపిస్తాయని ఆకాంక్షిస్తూ, ఆశీర్వదిస్తూ, శుభాభినందనలు తెలియజేశారు. ఇక నీవు ప్రారంభించే ..ఈ కొత్త అధ్యాయంలో నీకు శుభం కలగాలని, విజయం సాధించాలని మనస్ఫూర్తిగా ఆశిస్తున్నానని ఎక్స్ వేదికగా రాసుకొచ్చారు. దీనిపై నెటిజన్లు స్పందిస్తూ.. మీ తమ్ముడు మొండోడు సార్ అంత తేలిగ్గా దేన్ని వదిలిపెట్టడు. చెప్పింది చేసి తీరుతాడు అని, ఏపీ డిప్యూటీ సీఎం పవన్ కళ్యాణ్ అని పలు రకాల కామెంట్లు పెడుతున్నారు.